بيروت
لمياء محمود
بصي بقى إنتِ اتعودتي مني اجي لك عشان استخبى .. وأنا عمري ما فهمت أنا ليه باجي استخبى فيكي ، يمكن عشان أول مرة جيت لك اكتشفت إنك بتحبي الحياة أوي؟!
الاخضر فـ بيروت غير الاخضر بتاعنا والبحر كمان .. والناس بتحب تعيش محدش بيفكر بكرة شايل اية
جايز عشان الناس دي عاشوا فترة باحتمالية دايمة إن بكرة أصلاً مش حييجي
أنا عايزة آجي لك دلوقتي .. عارفة؟! .. مصر كلها شبه البيت اللي قرر اهلك يسيبوه من غير ترميم عشان يفكرهم الحرب بتعمل اية
مصر بقت ريحتها دم .. والناس ما بقوش طايقين بعض .. وأنا اتغيرت كتير عن أول مرة شوفتيني فيها .. أنا ما بقيتش بحب الناس وعايزة استخبى منهم
بس أنا مش عارفة اجي لك عشان زعلانة منك .. عارفة ليه؟!
عشان وأنا ماشية آخر مرة ما مسكتيش فيا اشرب آخر فنجان قهوة ع البحر .. ما مسكتيش فيا اعدي لآخر مرة ع الروشة واسمع عبد الحليم ونسيتي تقوليلي إني كنت بحب النسكافية في السوليدير
عارفة كمان أنا مش بس زعلانة منك أنا مش عارفة اجي لك .. أصل أنا كنت بحب آجي عشان بلاقي عندك دايماً ناس شبهي ناس كده ما بقوش عايزين يضايقوا بعض ولا يضايقوا نفسهم .. عايزين يضحكوا ويكونوا مبسوطين
إنتِ عارفة علاقتي بالضحك صح؟ .. حكيت لك أنا الحدوتة كلها آخر مرة كنا سوا .. وحكيت لك كل الحاجات اللي ما كونتش بعرف اقولها لحد وبخبيها على نفسي
بس إنتِ برضه سيبتيني أمشي .. كأنك بعتيني اتفرج عليكي قبل ما تخفي
فاكرة أما كنت بقولك أنا واحشني فـ مصر 3 بني آدمين .. كنتي دايماً تسأليني على إسم واحد من ال3 باستغراب وأنا كمان كنت مستغربة بس أنا وإنتِ ما بنحبش نسأل كتير اسئلة ملهاش إجابة
كنت بقولك حرجع مصر عشان هي أولى يعني .. عندها 3 أسرار مش عندك
على فكرة ال3 أسرار دول كمان ماتوا .. الموت فـِ صوتهم وضحكتهم المفتعلة أوي وكل حاجة .. وعنيهم مش شبه عنيكي زي ما كنت بقولك عليهم
بس أنا كمان ما بقاش ينفع اجي لك .. عارفة ليه؟!
عشان دي أول مرة نتكلم سوا واحس الكلام بينا ماسخ وملهوش طعم .. أنا كمان ما بقيتش شبهك ولا عارفة ابقى شبه البيت اللي سيبتيه عشان يفكرك بوحاشة الحرب
