مقاطع من كتاب الخلق والموت
ناظم نور الدين
(1) قمر وبنت وحيدة بتنور ف الضلمة
البنت اللي خباها القمر ف كمه
بتقضي ليلها ف عتمة الذكرى
بتغني وحدها غنوة
على لحن أحجاره الكئيبة
يا مسافرين يم القمر
نحية وشه المنور
قولولوا فيه ناس هنا
لسه أوانهم ما آنشي ؟
قاعدين بيتصبروا
بالمر لما مرر
طعم الغياب ف الحلوق
وانت نورك ما بانشي
جايب معاك أخبار لهم
ولا هيستنوا أكتر
دمع السهاد ف العيون
بايت سهران ما نامشي
يتحول كل الدمع النازل من عينها
لبخار
وف لحظة ضيق ينفخه القمر
ينزل أمطار ع الأرض
مليانة رسايل عشاق
بيشكوا لبعض الوحدة
(2) عروسة البحر وعلاء الدين
بنت بتلعب بخيوط الشمس
والشمس رغيف ف ايدين جعانين
بيقضوا عشاهم نوم
وانتي الحاجة الباقية من الذكرى
قلب بيتحول لأشارجي مرور
بينظم نفس الغنوة الباهتة
على ايقاع الحواديت البايخة
فتصحى البنت النايمة ف قمقم
وتقرر تكسيره
وتكسير كل الاحلام البايخة
اللي حلمت بيها ف يوم
مع ولد تعاطفا مع حالته الصحية
سمته علاء الدين
لكن نست تديله مصباح وبساط
يوصلها بيهم لسماها السابعة
من البحر اللي بيغزلها ف حواديته
عروسة بحر
(3) صورة يوسف
يا هل ترى الشعرا
جوة فناجين القلق
لسه قادرين يرموا حيَّاتهم
تلقفها أبياتك يخروا ساجدين
فيحجوا بيت الشعر إيمان واحتساب
... ويهزون عليك بجزع القصيدة
يتساقط المعنى ف حجرك
زي الواح الوصايا
يكفروا بيك العيال
اللي ندهاهم سكك مش سكتك
فتعيش نبي على أرض كارهاها السما
وتكرهك كل البيوت
فتموت إله
(4) ما تيسر من سورة الأحزان
هـ دال يه راء
تلك آيات الحنين والشوق
لزلزلات الفراق
طعم الشجن
يا أيها العابر على روحي
مبقتش قادر
وانا الصابر على إنقطاع الوحي ست شهور
وأنا المأمور بالهوى في الوحي
وأما أمنت بسطوته
خاصمتني النبوة
أنا الأحزان
إذا ما بصيت للسما
مطرت بعد ولهيب
طوبى لكل العطشانين دمي
دمي لكم
أوتأمرون الناس بالعشق الحلال
وتعذبوهم رغم تأدية الفريضة
وتنسوا إنكم زارعين طريق العشق
دايما بالفراق
الوحي مقطوع م السما
ومفيش كلاب بتنجس الخلوة
ومفيش مفر من القيامة تنطلق دلوقت
لا كرامة لنبي عند ربه
فليه بتؤمرني بأكل تفاحة الوله
إذا كان قرار نزولي م الجنة
جاهز وممضي
ومصلية عليه الملايكة بدمعها
وازاي بتديني النبوة
وانا اللي مولود من غير رسالة ومعجزة
وازاي بتسلبني البنوة
وانا اللي كل ملامحي حتى خلايا دمي
بتشبهك
آن الأون
إنك تقول أنا أبن مين دلوقت
مفيش نبي بيكون سفاح
أنسبني لفراش السما
أو حتى حولني لمجرد إبليس لعين
واطردني من جنتك
دلوقتي حالا
(5) ولد وبنت ومعجزات خايبة
الولد اللي بيلعب بخيوط الشمس ف عنيكي
كان هو هو اللي انطرد حالا من الأحلام
عشان خايب
مبيصليش
وما بيعرفش الفرق بين حبك لذاتك وحبك ليه
كان فاكر إن الرؤية من عند الإله
وأنه نبي بحق وحقيق
مكانش يعرف أن شرط المعجزة
أنه يكون ف الرؤيا كبشين إسماعيل
وانتي الاله اللي مقرر دبحهم
لأجل أما تكمل أسطورة عفو الاله عن البشر
البنت كانت فكرة بكر بتتولد
بتسابق الزمن اللي باقي على اللقا
كام ساعة فاضلة على اكتمال المستحيل
كان اللقا مسلوت من عين الاله
دمعة ذرفها وهو نايم
علشان تكون المعجزات
حاجة خايبة
بيصدقوها البشر أمثالي
مع أنها مجرد لعبة بتلعبها الالهة
علشان نحس باحتياجنا ليها دايما
