He said .. She said part 2
لمياء محمود
- بحبك
- إنتِ عارفة مع إن دي أول مرة تقوليها بلسانك إلا إنها أضعف مرة اسمعها فيها؟
هي كانت عارفة إن كلامه صح ، وهو كان عارف إنها بتعمل زي البحر لما بيرمي كل اللي جواه عشان يروق وينضف .. يمكن الكلمة ما اتقالتش غير لأن مشاعرها خلصت .
كانت عارفة نفسها كويس .. هي ما بتعرفش تعبر عن مشاعرها إلا فـِ لحظتين ، الانفعال أو النهاية .. ودي كانت النهاية
......
- عارفة؟
- اية؟
- أنا معنديش ثقة فـِ حد غيرك .. يا شيخة ده لما الشيطان حتى بيوسوس لي بحاجة ليها علاقة بيكي بقوله غور فـِ داهية انتَ مش عارف دي مين؟!
- أهو ده شعور متبادل .. الحب عادي جداً تلاقيه أما الأمان ده هو اللي صعب ، بيتهيألي ده الرابط الوحيد بين أرواحنا
فيه حاجات كتير على قد ما كسرها مستحيل ، على قد ما سلامتها موجعة
......
- أنا عايزة امشي
- تروحي فين؟!
- عايزة اسيب كل حاجة ، عايزة اسيب الناس .. الناس بيخلوني مش عارفة اتنفس وكأنهم بيتزاحموا جوه صدري ويضغطوا ع الرئتين
- الجنة من غير ناس ما تنداس
- يعني أنا مش حعرف اتنفس حتى فـِ الجنة؟
- بطلي نخريف
- إنتَ إزاي فجأة بقيت مش فاهمني كده؟
- أو انتِ اللي بقيتي عايزة تحسي إني مش فاهم مثلاً؟
- أو أكيد
......
- أنا عمري ما شوفتك بتبصي لحد البصة دي!
- وهو عمره ما فهم معنى البصة دي
- فهميه
- الفهم لا يمنح ولا يستحدث من العدم
- والتصديق؟
- كل واحد بيصدق اللي يريحه
- الأمان حلو مفيش كلام
- حتى لو فـِ خطر مألوف .. أهو اللي نعرفه
......
- وانا بحكي لها عن آخر قصة حب ليا بيتهيألي كنت مفتعل
- وإنتَ بتحكي لها عن آخر قصة حب ليك كنت بتزقها
....
- تفتكري فـِ النهاية حنبقى بنحكي لبعض اية؟
- النهاية حتيجي لما أنا وإنتَ نبطل نحكي لبعض عن بشر ما نعرفهومش
- حنحكي عن اية؟
- النهاية حتيجي أما نبطل نحكي لبعض أصلاً
