رسالة العيد
مساء الخير
صباح الخير
مانيش عارف بتوقيتكم هناك هيكون
مسا او صُبح
فهبعت لك سلامي اليك
واتبِّت ع السلام فـ ايديك
واما بعد ..
خِلص رمضان اوام يا ابا
وعدي صاروخ
دعيتلك فيه كتير يمكن
وحبه نسيت
فبتأسف علي النسيان
لكن مجبور , بدعوه كمان
من القلب اللي جوا البيت
بدعوة امي والاخوات
وكام صاحب محوشهم
عشان يدعو
فدعيولك وانا أمنت
ولو سكتو فانا كملت
ولو مشيو فانا ضليت
وانا اللي بكيت
..واما بعد ..
فحابب بس اني اقول
بان العيد خلاص قرّب
فبستأذن
انا محتاج
يومين افرح بدون ما اهرب
ووحياتك ما تزعلشي
مانيش هنسي ما تقلقشي
وهفتكرك ,, وهدعيلك
لأول مره هدعيلك
بدون رعشه فـ جدار القلب
ولا دمعة فـ طرف العين
دي دعوة قلب ابن سعيد
في يوم العيد .
هتوصلّك باذن الله
باذن الله
ما ترجعشي
