الروح الرابعة: أشكو اليك أموراً أنت تعلمها
لمياء محمود
فـ البداية كانت بتكتب لربنا .. بتحكي له اللي حصل فـ اليوم
"إزاي يارب تسيبني أزعل أوي كده؟"
كانت بتشتكي له م اللي مضايقها وتحكي له ع اللي فرحها وعشان تبعتهوله كانت تقطع الورق صغير أوي وتعمله عصافير الجنة .. وتراقب الورق وهو بيطير فـ الهوا
_ يارب ، بابا بيسيب اخويا يضايقني .. بس ماما جابتلي جيب جديدة _
ودايماً واثقة ان ربنا حيعمل لها كل اللي هي عاوزاه فـ الآخر عشان هو بس اللي عارف هي عاوزة ايه .. وهو بس اللي هي بتقوله هي عاوزة اية
لما كانت بتنسى الصلا أو أحياناً بتطنش كانت تكتب له بعد كل الكلام .. أنا آسفة اني مجيتش ليك النهاردة
مكانتش لسة عارفة ان ده اسمه الاعتقاد أو الإيمان .. كانت كل اللي تعرفه ان دي الحاجة الوحيدة اللي مخلياها مرتاحة
واما بدأت هموما تكبر بدأت كتابتها تكبر وتخبي ع الناس كل الورق اللي بقت بتشيله .. ولما حبت تخلي أحمد بس يقراه
قالها إنه فرح أوي لما قراه وهو شارب حشيش
فزعلت من أحمد وكتبت لربنا "والنبي خلي احمد يبطل حشيش ، وخليني ابطل اعرفه
ودايماً ربنا بيحقق لها اللي هي عاوزاه فـ الآخر
