سفاري
عمرو شاهين
سفارى
صاحبي اللي سافر في رحلة سفاري
لأخر ضفة في روحة
علشان يصطاد حبه عيال
كانوا ب يلعبوا حواليه زمان ف المدرسة
قطع تذكره الرحلة
من صاحب القهوة اللي ب نقعد نرغى عليها
ونقوم
من غير ما ناخد م القهوجي باقي الحساب
أو حتى يدفع لنا بقشيش زيادة
عن حاله الونس الممل
اللي ب يخلقها الكلام
وتهون الوحدة على كوبيات الشاي بالليل
موجود معايا
بيتنا القديم
كل الكوّر اللي قتلتها عن عمد
لأنها
كانت ب تضحك عليا كل أما يدخل فيا جون
قلقي السخيف
الطوبة اللي فتحت دماغي زمان
من قبل حتى ما تصبح دماغي لوحه نشان
لكل عصيان العساكر
أول دور برد خدته في حر يونيه
كلهم عزمهم الليل الخبيث
على فنجانين فيروز
وعشرة أسمهان محبوسة
صاحبي اللي سافر في رحله سفاري
كرسي وجوده لسه فاضي .. ما اتملاش
الليل و لأول مره
ما يعرضش علينا أفلامه الأبيحه
ولا يوزع الحان بيلغ حمدي .. كوتشينة
في بوله بوكر ع الأحلام
الليل المرة دى ب يحكى
عن وجع واحد ف صحرا
خاصم الصبار جبالها وسافر
للقبور الفخمة في أطراف المدينة
وعن اشتياق الشمس للواحد
واشتياق الواحد لنور الشمس
و الاتنين
ما يقدروش يتجمعوا
الشمس بتقرب أوى
والواحد برضوا ب يقرب أوى
وقبل ما تلمس شفايفها جبينه
صهد اللقا
يقطع المشهد .. بإغمائه سخيفة
الليل ع الضفة التانيه ب يراقب ب نشوى
يمسك التليفون
يطلب ندى الفجر الكسول
- عايزك معايا
مجذوب جديد ..
محتاج لجرعه من المخدر
علشان يلف في دايرتى
صاحبي اللي سافر في رحلة سفاري
أصبح صديق الليل أوى
لدرجه
انه كل يوم الصبح
ب يفرد نفسه شمسيه
علشان نقط الندى
تفضل في حضن الرمل
ذكرى م الليلة اللي فاتت
