على ورق الهدايا
عمرو شاهين
على ورق الهدايا
وقتها
ممكن مؤلف عبقري يكتب دراما عن الإله
من غير ما تنزعج الرقابه أو يشنقه شعر الدقون .
وقتها تقدر تسيب السطر فترة
تتغير الأسماء
وتهد موتيفات الديكور
فتمثل الفيلم التاريخي
من غير ما مخرج منحرف
يحكم عليك
بالطواف ف النص .
في اللحظة دي
تقدر تشيل الخام
وتمثل المشهد علي ورق الهدايا
الدراما مش حدث
الدراما رغبة خيالك ف الحدوث
قدره جنونك ع الثبات
قدره ثباتك ع الجنون.
ماأنتاش ممثل منفعل
ولا حتي جمهور مشترك ف الملحمة
انت الحقيقه المُلهِمة
والفيلم اصلا مُقتَبس
فماتنزعجش لما المشاهد تتحذف
الدمع مونتير محترف
والحزن تتر .
قد يسألوك عن الملايكه
أوعاك ترد
الصمت دايما ف مصلحه القتيل .
و إذا دخلت علي الإله
لا تنحني إن تُأتمر
بل إنحني علشان ضميرك أقنعك
ان بركوعك للإله
تقدر تمكيّج بطله العرض الوحيدة بالسعادة
تعمل عيون الناس زوايا للحدث
يمكن ساعتها ربنا
يعرض حياتك ع الملايكه
فيقبلوا يدوك جناح
وتنزل للسحاب
