أحببتك كما لو كنا سنموت في نفس اليوم
لمياء محمود
أحببتك كما لو كنا سنموت في نفس اليوم
ليس بي قلب لأقرأ عن الانتظار .. وليس بي وعد لأعدكم القوة
"ليت الذي بيني وبينك عامرٌ وبيني وبين العالمين خراب"
حلاوة الروح هي اللي فاضلة ما بينا بتتطوح _ أنا امرأة يعز عليها الانتظار _ فعارفة اني حصحى في يوم مكتفية بالمخزون منك وحبعد .. وكل ما اليوم بيقرب بتزيد عندي المعرفة بحتمية القرار ، عدم وجودك مؤلم في أول يومين ووحشتك هي أول وحشة اعرفها في التاريخ .. بعد كده الحياة بتفقد كل حاجة وبترجع عادية
وبرجع أنا .. بنفس الاداءات المتلاصقة اللي ورا بعضها .. ودخولك المكان بعد فرقة بيحتاج مني فترة عشان اتعود عليك من تاني
" وكأنك من دمي"
زمان كانوا بيقولوا لي ان البط هو الأطول روحاً لأنك ممكن تشيل رقبتها خالص وتفضل واقفة .. دلوقتي بس عرقت ليه ماما كانت دايماً بتقولي يا بطة
النموذج المثالي لكل حاجة .. مين يقرب؟!!
لازم الواحد يبقى عارف هو عاوز اية وخايف من اية ويقرر.. مرحلة م الصفاء النفسي وبعد متعمد عشان تاخد كل المساحات الي حتقرر فيها فتقرر .
فتقرر تاخد آخر بق م العصير وترمي الكوباية
أنا عندي 3 أسرار أهمهم آخرهم .. 2 محدش يعرفهم غيره ، والتالت محدش مش عارفه غيره وبكل المحاولات المضنية ، وبطاقة كل السنين اللي فاتت دي أنا حعلن خروجي م المتاهة ونسيان السر التالت
المراية بعيدة جداً والطريق على مد شوفي
لسة كتير .. ودلوقتي أنا عرفت النهاية الطبيعية للحاجة الساقعة .. مش غلطة حد غيري
عموماً .. انت صح!
