ضفاير
ضياء الرحمن ضياء
ضفاير
البرد غربة و الغربة برد
احساس غريب لو تلقى نفسك
مش زى حد
او تبقى واحد و الكل فرد
احساس غريب
الفراغ
اوقات بتاكل فيك بمهل
و افكار بتتكاتر عليك
و جدل يدور بينك و بينك
ع اللى كان ومعدش فيك
و ازاى بقى كل الفرص
بتعدى سهل قصاد عنيك
وانت يا دوب حتة خشب مربع ايديك
الزهق
مخلوق يحب الانتظار
و مافيش زرار يعرف يحل المسألة
و المشكلة ان الحلول محتاجة وقت
و الوقت قال لك من دهب
و الجيب خروم
تدخل ثوانى العمر فى تتسرسبك
يوم بعد يوم
تلقى اجابتك تسألك تعرف تعوم
ف تشد ايامك عليك
تغطس ف نوم
الملل
مرسوم على و شوش
الساعات
ويا الحاجات مستنى تحصل معجزة
ان الثوانى اليابسة يتحركوا
ف الدنيا تمشى ان شا اللة لو
على عكزات
القلق سكن القلوب
و الجيوب مقلوبة برة
و العيون مش مستقرة
و الجميع متلخبطين
الطريق
منحوت على نعل القدم
و اخر طرف ف البنطلون
لساة بيرسم شخبطة
و عينيا فوق متشعبطة
شفت القمر لمبة نيون
و الكهربا مستعبطة
دايما بتيجى بالمزاج
و الفيشة اصلا مش معاك
بتعوز حاجات ف تجيك حاجات
و كأن فعل الاختيار
رفاهية عالية مغمضة
الجسد شادد لتحت الروح
ساجنها فى واخدها فين مايروح
و هى مشتاقة الصفا لحظة سماحة و بوح
لكنها بتخاف تسيب لحسن تتوة
الروح
دى من امرة هو
تتعب دماغك لية و تسأل
ازاى و لية قلبك هوا
القصة اصلا مش بتاعتك القصة بس
اللة نوا
مخلوق و مكتوبلك كبد
قلبك كتير ياما اتهبد
و الراحة موت
يعنى المحبة والكراهة
بلا اى صوت
تختار سكوت
ولا يلفك خيط مسد
اخترت اية
