الروح التانية : سألت عن الحب أهل الهوى
لمياء محمود
وهي بتخلص الابتدائية كانت سعيدة جداً أما طلعت الأولى ع المدرسة ، بس كانت حزينة جداً لأن كل الناس اللي بتحبها حيدخلوا المدرسة التانية وهي حتدخل المدرسة اللي بيقولوا عليها كويسة دي
أول يوم كانت فرحانة أوي باليونيفورم الجديد ، بس الملعب الأكبر كان محسسها بالغربة والوشوش الكتيرة الجديدة اللي مش شبه الناس أوي .. هي أصلها متعودة إن الناس نيفين وهشام وشيماء وريهام
ريهام .. بس لقت ريهام في وشها وكانت سعيدة سعادة التنين المراهق في موسم التزاوج بإنها لقت حد تعرفه حتكتشف معاه الوشوش
اتعلمت وقتها تغير بنطلون المدرسة بالبنطلون الجينز وتطلع الشميز بره وتشمره وتعمل قصة على جنب ، وبدأت في متابعة ظاهرة غريبة جداً وهي تواجد عدد غفير من الشباب أمام باب المدرسة وأكتر من عربية "أتاري" قالولها بعد كده ان دي يعني عربية شرطة
وكان اما يدق جرس المرواح الشباب اللي واقفين بره بيتوزعوا في مهام محددة وهي تظبيط البنات واللي كان بينجح في مهمته كان بيقف مع البنت اللي ظبطها واللي كان بيفشل كان بيستمر في محاولاته ومجهوداته باستماتة وعربية الاتاري عمرها ما عملت حاجة مفيدة غير انها وقفت
أمها كانت بتقولها البنات اللي بتقف مع الشباب بره دول بنات وحشين .. وهي كانت شايفة ان كل الشباب اللي واقفين بره دول تافهين.. بس بالدخول فـ تاني سنة بدأت تجمعات البنات في زاوية فـ آخر الفصل وكل واحدة فيهم بتحكي عن أحمد ، دايماً اسمه كان أحمد
بس هي الوحيدة اللي مكانش عندها أحمد .. فكانت بتقعد تسمع وتتخيل أحمد على إنه شاب عشريني طويل وفيه شبه من مصطفى قمر عشان اسكندراني
في آخر سنة ليها فـ المدرسة الاعدادية اتفاجئت بتليفون من احمد .. اللي مطلعش بعد كده احمد
بس الصراحة هي عملت المتوقع منها وقالت لاحمد .. انا مش مهتمة خالص وانت قليل الادب ورزعت السكة في وشه بكل كبرياء .. وبسعادة خفية مصدرها الوحيد انها بكرة حتقعد في زاوية الفصل تحكي بكرة للبنات هي عن احمد
المجهول المعجب اللي بيتصل فـ اوقات محددة جداً على تليفون البيت وفاكر ان هي مش عارفة هو مين .. وبدأت تسأل هي المفروض ازاي تتعامل مع احمد
وطبعاً البنات التانيين شخصيات محنكة ذات خبرة كل واحدة طلعت برأي
اتقلي
كلميه .. كلميه
انا حاجي معاكي عشان تقابليه
أما هي فقررت تستمتع بس بانها ترد وتزعقله كل ما يتصل
