مرسال للى راح قبل معاد الوصول
زينب فرحات
بعتنا الجواب للى راح
وكتبنا المرسال للى جاى
ومفضلش من دوشة وجعنا
الا شوية حروف
جم من نصيب اللى راح
من قبل اما يجى معاد الوصول
---------------------------------------
العزيز "العصبى"
بتصدق فى رسايل السما؟
أنا بصدق جدا وهحكيلك على دليل
امبارح كنت غايبة من الشغل وتعبانة جدا
بس اصحابى اصروا انى لازم انزلهم
الغريب انى نزلت وسط البلد قبلهم
قعدت مع نفسى بستغل الوقت فى محاولة للتدوير على اجابة مقنعة عن السؤال المعتاد
مالى؟
لانى متنحة جدا فكتبت فى الاجندة الكلام كان بالنص"لو التاريخ بيكرر نفسه ،فمعايا بيتغابى وبيوجع ، كل مرة ببقى أجبن من اللى قبلها"
ليه حاسة ان "المناضل" و"الرزينة"و"المهذب" هيتحولوا للجزء الجديد من فيلم "المغترب"و"المتفائلة"و"العصبى" ؟؟
وليه مرعوبة من ده؟؟
وصلت لقمة الجبن والتناقض
عايزاهم موجودين ومش عايزاهم
ابطال الفيلم القديم وصلت لحالة ان نصى بيكرههم ونصى بيحبهم
كل محاولاتى للاحتفاظ بيهم تحت اى مسمى فشلت
مش مهم سبب الفشل
المهم انها فشلت
وبقيت حاسة انى ملعونة وان مجرد ما بحس بالأمان لازم اتوجع
طب هو الحل يعنى انى اقطع علاقتى بكل الناس؟
مش عايزة أتعلق بـ"المهذب"
ومش عايزاه يبقى الاخ اللى بحلم بيه
مش عايزة استريح لحنية "المناضل" واحس انه ضهرى
مش عايزة احب "الرزينة"
واخطط معاها لفرحها واسامى ولادها
نفس الكلام بسمعه
اللى كنت بتنشق على ربعه دلوقتى مش طايقة كله
كل اللى حواليا واثقين انهم بجد ومشاعرهم مش مزيفة
كمان انا دلوقتى اقوى ومش معتمدة عليهم تماما
ما بقتش مكسورة ومضغوطة زى الأول
بس بقيت جبانة
مستنزفة لدرجة مخليانى مش قادرة احب حد
افتكرتك جدا
امبارح بس فهمت كل تصرفاتك اللى كانت بتجننى
افتكرت لما سألتنى هو انتى ليه ما ظهرتيش وانا عندى 21 سنة
لاقتنى بقول "للمناضل" هو انتوا ليه ما ظهرتوش بدرى؟؟
"المناضل" قرا اللى فى الاجندة
وقام باس راسى فى وسط القهوة
شعور غريب
مبسوطة ومش طايقة نفسى
حسيت ان مجرد وجودهم فى حياتى وثقتى فى حبهم دى بتضغطنى جدا
فهمت انا قد ايه بضغط عليك
فهمت حكمة ظهورك فى الوقت ده
وافتكرت قصيدة بتقول" كان عارف ان الدنيا بتبدل نعمة بتانية خلته ما يخافش الخدش"
مش هسيب نفسى لغاية ما كل طاقة الحب اللى جوايا تخلص وتتبدل بخوف
ومش هبطل احب اللى حواليا واديهم فرصتهم
بس برده مش هعتبرهم مسكنات
مش هحطهم فى ادوار ثابتة فى دماغى لانهم مش حجارة شطرنج
والأهم
ان مش دايما كل حاجة حلوة بتسعدنا
مش هفضل موجودة فى حياتك واضغطك
لمجرد انى مش مقتنعة انى مؤذية
شكرا لكل لحظة كنت موجود او مش موجود فيها
شكرا لانك العصبى .. العزيز
