ساعة واحدة ما تكفيش
لمياء محمود
ساعة واحدة ..
ساعة بخطفها من وسط الوجع سِرقة ومن غير استئذان
ساعة حضحك ، ارجع أنا .. لمعة عينيا تظهر
اصحابي يتبسطوا
مسكن قوي المفعول ما يستمرش أكتر من ساعة
فـِ الساعة دي كأن الظروف غير الظروف والدنيا غير الدنيا
فـِ الساعة دي بعلن عن انحيازي التام ليك
وانحياز البشر لينا
ونفضل حدوتة تتدرس
ساعة حسرق فيها حضن عابر
وافضل اوعد نفسي إني حسرق الدفا كله واحوشه
عشان كل ما رعشة برد تصيبني دفاك ينجيني
وافتكر الضحكة م القلب كان شكلها اية
واوعدني إني ححفظها .. ححفظ كل تون فيها عشان اكررها فـِ غيابك
ما برمش عشان اجمع صورتك فـِ عينيا
واغير من أي حد يشد اهتمامك غيري ولو دقيقة
ساعة واحدة
بتنتهي بلمسة إيد
وبتسحب مع إيدك كل اللي فات
ويرجع الوجع وكأنه ما خفش لحظة
ساعة زمن ما عادتش تقضي القطع فـِ قلبي
ولا تكفي البرد الناشع فـِ روحي
ولا تجيب ضحكة تمسح دموع ما بتنزلش دايماً غير آخر الليل
