عن البنت اللي ......
لمياء محمود
عن البنت اللي جدتها حلفتها ما تحبش غير اللي يعرف لون شعرها ، فبتغششك عشان تاخد بالك .. البنت اللي بتحلم بـ 8000 ليلة مجنونة مفيش واحدة فيهم شبه التانية وكلهم معاك .. البنت اللي ما تعرفش أصول اللعبة لأن عمرها ما لعبت ، وحتى لو دخلوها الملعب زَق بتدور طول الوقت على مخرج ما يجيبهاش الأرض.
البنت دي بختها على قدها ، وقلبها لاء ، وصحبتها بتزيد مع كل جرح .
بنت تعرف تاخدك ل100 دنيا ولو سيبت نفسك تخلصهم حتكون اكتشفت 100 باب جديد لـ100 دنيا تانيين ونفسها تتفرج على شريط الفيلم بتاعك من غير ما إيدين المونتير تطوله
عن البنت التي .. تعلمت وضع مساحيق الزينة والاختباء خلف نظارتها الشمسية، فتوقفت عن لعبة توصيل النقاط
عن البنت التي .. تكره الأيادي التي تكتفي أطراف الأصابع عِند السلام
البنت اللي ما بتنامش تقريباً .. بتحزن بهدوء ، بتتصدم بشياكة وما بتقولش كتير
البنت اللي بتحلم طول الوقت بالبعد ومهما جالها من فرص عمرها ما بعدت .. البنت دي عمرها ما حتعرف تقولك هي حاسة بإية بس حتعرف تعمل كل حاجة مرتبطة بإحساسها ، ولو سألتها احتمال تنكر باستماتة
بنت اللي يقرب لك تقتله
واللي يوجعك يدبحها
محدش يعرف يركز فـِ عينيها أكتر من ثواني
محدش يقدر يرد لها كلمة
اللي ييجي عليها تعدي له مره ، وتموته مرات
لما بتتعصب بتقول كل الكلام جارح
وأما بتتأسف ما بتعرفش تقول أنا آسفة
بنت اللي يخوفها ....
.
.
إنتَ!!
