عن مصر التي أعرف
يحي قدري
أول مره في حياتي أعيط وأنا بعالج حد والمفروض
إني الشخص الأكثر ثباتا كطبيب في المواقف دي
يعني إيه ست عندها سبعين سنه على كرسي بعجل
داخله محمد محمود لوحدها
مره واتنين وتلاته
ولما سألتها رايحه فين ياست انتي ؟ قالتلي يعني
أسيبهم يضربوا العيال .. جايز لما يشوفوني يتكسفوا على دمهم يا ابني
هاتموتي ياوليه ؟
يعني اللي ماتوا واتشدوا من شعورهم في الأرض واترموا في الزباله مكنوش ولاد ناس
أنا أبقى زباله لو قعدت أتفرج عليهم وأولول زي الحريم
.....
واحد طلعنا من جسمه تلات رصاصات حيه وهو صاحي عشان مفيش بنج ولا امكانيات غرفة عمليات
وسط ذهولنا وعنده الشديد اننا نطلعهم عشان يجري تاني لولاد الوسخه
..............
راجل بعد لما فوقته من الغاز اللي فعلا اتأكدلنا
ان فيه قدر لايستهان بيه من السميه
وان له تأثير سريع على الجهاز العصبي
تصل لحد حالات تشنج وتوقف التنفس
قاللي يا ابني انا معايا عشين جنيه
قلتله يا حاج انا مابخدش فلوس
قاللي يا ابني انت مقامك عندي ييجي ميتين جنيه
طبعا فطست على روحي م الضحك لأن ده اكبر مبلغ الراجل ده يعرفه تقريبا
قاللي طب أجيبلك إيه للمستشفى اللي بتفوقوا فيها الناس دي
يعني أروح الأجزخانه أقوله إديني ايه ؟
قلتله هات قطن وشاش يا حاج أي نوع قطرة عينين
قاللي بس لو عدت العشين جنيه .. هاا .. وضحك ومشي يجيب الحاجه
....................................
دكتوره فوق الخمسين تقريبا رجليها الاتنين ربطت عليهم رباط ضغط
زي بتوع هوكي الجليد عشان رجليها تقريبا اتدغدغت وسط التدافع
وصممت ماتروحش بيتها في طلعت حرب
وقعدت وسط العيال الدكاتره تناول شاش وقطن وعصير
..........................................
عيل من الأولتراس عنده تقريبا 14-16 سنه
جاللي تقريبا اربع مرات مضروب
خلاني اتجننت عليه
يا ابني روّح بقى هو مفيش غيرك بيتضرب جوه
فوقني بس يادكتور عشان أعرف آجيلك تاني
وربنا لاوريهم فاكرين اننا أفيات
ياض روح الزمالك مش هاياخد الدوري برضو
وكل الناس بتضحك وتعيط في نفس الوقت
محدش قادر يقول لحد ماتدخلش وماتشاركش
بس اللي بيحصل كتير
...................................
يعني إيه تبقى شلة الدكاتره والناس اللي بتساعدهم جايه من
- أسوان - رفح المصريه - المنصوره - الزقازيق - سوريا - المنيا - القاهره
بدون ترتيب مسبق وفيهم ناس بقت صحاب خلاص ومقسمين نفسهم جروبات من ايام يناير
ومحدش كلم التاني يقوله انزل عشان خايف يحصله حاجه
ويتقابلوا بالصدفه في التحرير
وأما اتكلمت مع الدكاتره السوريين
الليله مش بتاعتكو جايين ليه طيب؟
ولو حصلكو حاجه هنا مش هايبان لكو اصحاب ولاحد عارف أهاليكم ولا أساميكم
قالولي اعتبر اننا في سوريا يا سيدي وبعدين احنا ممنوعين من دخولها أساسا
خلاص بقى استضيفونا شويه معاكو
.............................................................
دكتور اخوانجي قتله البابا ماقلش انزل ايه اللي جابك
وبعدين كده مش هاتعرف تروح الانتخابات وتقش يالول
نرجو ألا تكون أحداث التحرير قلقت انتخابات سعادتك
قفلني بالرد عار عليا أنتمي للإخوان لو مانزلوش وكسروا كلام المرشد والبلتاجي
اللي بيتكلموا بنفس عنجهية مبارك وعمر سليمان
............................................................
مشايخ سلفيين كانوا بيأمنوا الميدان بطايق وتفتيش
ردوا بنفس الطريقه أنا أقدس الدين لا الشخص
ومحدش هايقوللي اعمل وماتعملش
اللي انا شايفو صح هو اللي أنا حاسو بس
مش كلام مشايخ التكييف اللي خذلونا
..........................................................
يمكن معنديش أي حلول حاليه ولا جه في بالي هطالب بإيه لما انزل
لكن مكنش ينفع أسيب العيال تتضرب وأقعد في البيت
حتى لو كنت ضد السلمي وضد جمعة 18 نوفمبر
وضد أي مليونات تكعبل الانتخابات
وتدي الفرصه للمجلس يتحجج بالاضطرابات ويبرطع زياده
وكلي خوف لما الناس بتقول يرحل المشير ايه اللي هايحصل
ولا هل المجلس الرئاسي المدني هو الصح ؟
وهل الناس هاتتفق على مجموعة من الأشخاص
لما معرفناش نتفق على حزبين تلاته ؟
لما كنت بتقول يسقط مكنتش عارف ايه اللي هايحصل
ولكنه حصل واكتر مما تخيلت
ماترضاش بأنصاف الحلول بدعوى الحكمه
كلي أمل ان المره دي تطلع برضو
الإجابه تونس
