متزوقيش حلمك
هشام صبح
متزوقيش حلمك بلون دمّى
و لا تطلبيش دفا حضنى
انا الحلم اللى عاش عاصى على التفاسير
ريحة الشقاوة الفايحة من عامل التراحيل
حنين جارف
و شوق أهوج فى لحظة لقا آدم
مع حوّا
طعم الشفايف مر م العلقم
متعطميهوش
عمرك دوام
متسليهوش
انا اللى ركَّعت شَيطانى فى ساعة نحس
و طوَّعته
و طاوعته
و طاوعنى
و غاب عنى سواد قلبه
أنا العايش غريب سوّاح
بدون مرسى
و عارف تمام يابنت الناس
يوم ما هتهدى مركبك عندى
هيضحكلى اوام اللى غاب عنى
و يا ويلك
أيا ويلى لو أرجع تانى للمبدأ
و احيد تانى عن المرسى
