أمل عُمر
محمود قطز
بتفكريني..
ببنت كانت معايا زماااان..
في ابتدائي..
كانت شاطرة في الحساب..
وكنت شاطر في العربي..
أبويا حفظنى جدول الضرب بالضرب..
وامّها حفظتها الحروف بالجاروف..
المهم..
كُنا احياناً بنذاكر مع بعض..
وأحيان كتير المذاكرة بتبقى لعب..
فتشد الكُراسة منى..
وأشد كُراستِها..
ولما نتعب م المُذاكرة..
تحلّ واجبي..
واحلَّ واجبها..
ونضرب الحروف في الأرقام..
ونسلِّم على بعض الصبح..
ونروح مدرسة "الشهيد عبد المنعم رياض الابتدائية"..
سوا..
فكرتيني بيها..
مش عارف ليه..
رغم مرور 30 سنة
انا شايف مكاني ومكانها في الفصل..
وبيفصل بينا طريق..
بيتمشى فيه المُدرِّس..
كُنا بنرد وراه نشيد امل وعمر وزينب ونرجس..
واتنين في تلاتة بستة..
بس احنا كُنا اتنين بس..
أنا عُمر.. وانتى امل
مشبكين صوابعنا..
وعنينا ع السبّورة..
وكان بيضحك الطباشير
ويكتب لوحده
