يا شعب رضيت بأحوالك
هيثم نور
-1-
يا دوبو.. جنين.. وبيوأوأ.. فتح.. عينه.. وبيبرأ
لأاه.. سلعه ف وسط مزاد.... صراخه عمره.. ما يحوأ
-2-
دي طفلة.. كفها مترب... على كتفك.. دي بتطبطب
بتدعيلك.. وبتملس.. أبوها...قالها تغلس
-3-
بيلمع.. طفل متأمع.. ومادد إيده... بيلمع
جزم واطيه.. وبيدمع.... وفين أهله.. ومين يسمع
-4-
بريئه... نهدها خادع.. وصغر السن... مش شافع
ما دام المهر.. ألف ريال.. مفيش مله... مفيش وازع
-5-
وكبروا... وهو بيبلطج.. وهي... شعرها محلول
على صدور الرجال مسدول.... وهو.. ع الطناش يقبض
ــــــــــــــــــ
يا جوع.. البطن يا مربي..... يا شعب.. نسيت.. عذاب ربي
أنا عاذرك.. مانيش شمتان.. لكني بلوم.. على سكوتك
..
يا شعب رضيت بأحوالك... ماهوش.. صعبان عليك حالك
ولادك رضعوا من خوفك.... على لقمه تزور جوفك
..
وترضى.. يسخرك.. سجان....... يهينك.. يسخطك.. إنسان
عديم الجدوى.. والعنوان... مأته.. خيالها يشبهلك
..
ومرصوصه.. يا دي الأبدان.. في نعش طويل... مالوش بيبان
وناس هايمه على وشوشها....... بتعرق طينه.. وتحوشها
..
وشقه عيش.. ومحدوفه.. بدبانها.. ومكشوفه
عليها.. الخلق تتسابق.... بريق سايل.. لحد ما جف
..
وع الاسفلت.. جري وحوش ...وغير الرزق.. لا ما نحوش
ونتصارع ... ونتصارع ...وبكره إزاي بأه مضارع
..
ومن إمتى إللي بيصارع.... بيلقى.. غير كتاب مكتوب
..
ونلهي روحنا بالأحضان...... ونغفل.... يتخلق إنسان
مكانه ف الطابور محفوظ..... مصيره.... يخدم السجان
..
انا حطيت صوابعي ف شق....... وديني.... كل كلمة حق
حقولها.... مش هيمنعني..... مصير... كل اللي قالوا لأ
..
ولأه... للي باع العرض..... ولا.. للي يهين الأرض
ولأه.. عاليه مسموعة ....دي سخرة.... رفضها.... بقى فرض
