الروح الأولى: يا سنين أحلى الحاجات
لمياء محمود
مامتها كانت طول الوقت بتقولها يا بنتي بطلي تتكسفي من خيالك .. أصلها مبتعرفش تكلم حد ولو حد غير حسين كلمها لازم تتلخبط فـ كل الكلام
بس كان الكلام كله بيجري على لسانها لما تقوم تقرا درس العربي بالتشكيل أو لما ترفع ايديها بسرعة ولهوجة عشان تجاوب على سؤال مستر مدحت وبتبقى فخورة أوي بكراستها المتسطرة كويس وخطها الحلو وتسهر تعد طول الليل ميس حُسنة ادتها كام ممتاز أول
كانت البنت الوحيدة اللي بتصحى متحمسة تروح المدرسة ، فتلبس الجيب النبيتي القصيرة وتركز مع كسرة القميص الأبيض المخطط ببمبة والبوت وتجري شايلة شنطتها عشان تحيي العلم من قلبها
صوتها الواطي كان بيعلى أوي وهي بتقول :تحيا جمهورية مصر العربية .. وبيخشع وهي بتقول أقسم بالله العظيم أن اكون مخلصاً
كانت سمرا ورفيعة أوي وطول الوقت عاملة شعرها الطويل ديلين حصان .. جدتها كانت بتخاف تعمله ضفيرة عشان الحسد فعاشت حلمها تعمل ضفيرة
كانت بتروح المدرسة تلعب مع هشام ونيفين وما كانتش بتحب شيماء ، بس كانت بتحب ريهام وبتكره اخوها الغلس اللي كان بيعلق طول الوقت على طول الجيبة
كانت بتخاف تلعب مع رانيا عشان رانيا بتحكي لها حواديت غريبة .. فبتفضل طول الوقت تلعب مع حسين ويجيبوا كتاكيت سوا وتعيط عليهم لما يموتوا كل يومين ، وحسين يواسيها
كان بيقعد يقولها ما كلنا حنموت .. فين ابونا آدم وستنا حوا مش ماتوا؟
فتعيط على موت أبونا آدم وستنا حوا
دمعتها قريبة وكانت تفضل تعيط لحد النفس ما ينقطع فتخاف عليها أمها وتقول نجمها خفيف أما جدتها فكانت تقول لاء .. ده طبع الغجر .. بكره تكبر وقلبها يقوى وتلعب بالقلوب
كانت بتقول لهشام لما يزعلها أنها اول ما تروح حتشتكيه لربنا .. فتصلي وتقول لربنا يارب أنا مش حشتكي هشام بس لو هو بيحبني خليه يبطل يغلس عليا
يارب أنا مش حشتكيه عشان ما تضايقهوش
أصلها دايماً عارفة إن ربنا مش حيسيبها تزعل .. وربنا عند ظن عبده بيه
