استبحس
لمياء محمود
كل الجمل بتتجمع فـِ منبت حلقي
مفيش جملة بتخرج فـِ مسارها المنطقي
الكتابة ع الحيطان
كلام الناس فـِ المواصلات
قطتي الشيرازي المخلظ
صاحبتي الأنتيم
نعم للاستقرار
نعم للشريعة
نعم لدستور الحرب الأهلية
مين القتيل الجي؟
الدم بيقرب .. !
هو كشف الأسامي مع مين؟!
شهيد ..
لاء مش شهيد
كانوا لابسين شورتات
ما تسيبوا ربنا اللي يحكم يا ولاد الكلب
احنا خلعنا مبارك
احنا لقينا نفسنا
احنا صح
انتوا كَفرة
ومن كفر مؤمناً فهو كافر
الدين بيقول ..
القرآن حمال أوجه
نعم لنصرة الشريعة
لا لحفظ الدم
أنا بحبَك ..
وأنا أجبن من دور البطولة
أنا بحبِك ..
وأنا مش فاكراك ..
كان إسمَك إية؟
الصحوبية والعِشرة والأخوة
طب عليا النِعمة كلام فارغ
الصح والغلط ..
نسبي
واضح
فاهمني؟! ، طيب بلاش .. حاسس؟!
أسيوط ، القطر ، العيال بيموتوا
معاً لنصرة أطفال غزة
الدم اللي ع الأرض والناس اللي ماتوا
معاً من أجل الاستقرار
أنا وإنتَ فشخنا الحب
مش أنا وانتَ بس اللي فشخنا الحب
كلنا بنفشخ الحب
الحب أصلاً فـِ كل اللي بيحصل حوالينا مينفعش يظهر
لاء ..
الحتة البيضا اللي تعافر جوايا عشان تتنفس بتقول ..
الحب هو الحاجة الوحيدة اللي احتمال تسندنا
أنا مش حعرض ايماناتي للاستفتاء
