ايه موّتك يا حسين ؟
يا محليين الحلا
بالشهد يا مسكّر
طعم الحياه ماسِخ
.ما تزوّدوه سُكر
زوّدت معلقتين
قلبت تقلبّتين
وشربتلي بوقين
ماسخه الحياه لسه
ومادابشي ليه لسه
ولا حبه م السُكّر
يا بكره ليه مسكّر
بالضبه والمفتاح
علي شمس بتجيب لي
مع كُل طلعه فلَاح
يا عم يا فلّاح
ازرع 3 فدادين
واحد هتزرع شوق
والتاني ازرع شوق
أما الأخير بالذوق
لابد هيكون شوق
وان كان لابد ندوق
ازرع لي شجرة تين
يا معشر الصايمين
عن كُل ماهو حلال
الحب اصله حلال
والبسمه ديا حلال
كان ليا أصلاً خال
واللهِ واسمه حسين
ايه موّتك يا حسين
غير شر بص العين
ما زرعش شجرة تين
ولا مره جرب داق
كان النهار خنّاق
ما يفوتشي غير بالشوق
ما زرعشي غير الشوك
ملو الـ 3 فدادين
الدم ملو جبين
ومغرّق الكفين
ايه موتك يا حسين ؟
لو لسه متذكّر
طعم الحياه ماااااسخ"
"عايز شوّال سُكر
