استانجلينا
محمد السيد عزيز
حد عارف بكره امتي ؟
بكره جايز يبقي عدي من سنين
والليلادي يجوز تكون مرت وفاتت
حد عادد ؟
كله جايز وفق توقيت الدماغ
واستساغ القلب فكرة بـ 100 جنيه
قالك ايه ؟
قالي دمّر كل رابط ثم ربّط كل خيط ..
واجري جري الخيل ف صحرا
بعدها تلبس ف حيط
والصراحه
رغم جهلي بالنتايج
الا اني كنت بشبه طور وهايج
كنت بتنشّق لفكره
اي فكره
فجأة خبطت دي ف دماغي
قوم لذلك
ابتديت اليوم انفذ
النهارده هخون مراتي
واقتل الواد اللي حيلتي
واحبس القلب ف فريزر
واكسر السور اللي عالي
واضرب الابله ف حضانتي
واخلع الشيش اللي حابس
اي شمس تزور حيطاني
اما فـ مخدة سريري
واجب الخنق لجانبها
وان منعني لحافي يبقي
هصلبه بطول الدولاب
بعد ذلك
هخلع العقرب ف ساعتي
واحذف الارقام ويمكن
اعصر الارقام ف ماية
ثم اصب المُر منها ف كوب ازاز
وافضل اشرب
اعطش اشرب
اسكر اشرب
ثم انشف
ثم اموت
لا تظن ان الدقايق أمر واقع
لا تظن ان الساعات دي هيا هي
الا تظن ان الاسابيع اللي عدت
تختلف عن غيرها جايه
وان سأل عابر سبيل " الساعه كام "
قوله بُكرة الساعه عشره
هبقي واقف جوا فصلي فـ تانيه أول
ثم هغلط في الاجابه
فاتضرب 50 عصايه فوق ايديا
اللي فجأ بتتقلب متشققه
وابقي ماشي مستند علي كتف واحد
شكله مني
بسأل البواب فقال ده محمد ابني
ابني انا
فجأة تلقي الدنيا تبقي مزنقه
ضلمه كحل
يجو ملكين يسألوني
دي اللي مش عارف ..
هجاوب ؟
.. مش هجاوب .. !؟
فجأة تلقي الدنيا تشتي
والزهور تطرح ربيع
والشجر يفقد ورق
والمصايف تشتغل
ايه العمل ؟؟
كوم ورق مصنوعه منه الطيارت
شد .. رخي
تلقي طيارتك بتسبق طيارتهم
وانت واقف فوق سطوح
نابك ايه بعد الكبر غير الجروح !
..
لا تظن الوقت عدي ..
لا تظن ان اللي عدي بجد عدي
لا تظن الجي مستني النهارده
لجل يجي
لا تظن العقل حكمه
في الجنون سر الهدايه والسلام
السلام النفسي يفقتده اللي عاقل
عمرك انت شوفت مجنون الا يضحك ؟
اما عاقل بوزه مترين فوق بوازه
والمشاكل نازله قاطمه وسط اهله
واللي نايبه انه عاقل
جاك مصيبه والف داهيه
الف وكسة و100 ندامه
واللي راجي جنانه حكمه
الف 100 مليون سلاما ..
نقطه .
