يا جلد الذات
محمد السيد عزيز
(1)
يا جلد الذات
علي الحاضر وع اللي فات
انا مسافر
عشان لازم يكون بينا
كتير مسافات
---
نسيت نفسي
وانا باخد
أخر نفسين
من الفله اللي فـ سجارتي
فحرقتني
مافيش طفايه جنبيا
فكان عادي تلاقي رمادها متفرفت
علي الترابيزه والمفرش
كمان ع الارض
كمان في الماضي والحاضر
بطول او عرض
وكان عادي
تلاقي بواقي من حلمي
مشاركه الطفي ع المفرش
انا بعطش
(2)
يا جلد الذات
يا ذكري جميلة وحشتني
يا ضحكتها اللي ناغشتني
انا واقف علي بابها
ومش هدخل
ومش جايب معايا حاجات
أنا مسافر
عشان لازم يكون بينا
كتير مسافات
---
ولما بشوفها فـ خيالي
بقول الله
واقول لو كنت انا اتكلمت
وكنت يوميها قولتلها
علي اللي فـ قلبي وما خبتش
كانت ضحكت
وقالتلي : انا بردو
بحب وقلبي بيخبي
ما بيبينش
(3)
يا جلد الذات
يا آثامي وذلاتي
انا دايب فـ آناتي
وبتلذذ بجرحي كتير
فماتظنش
يا شايف جرحي ومطنش
بأني يعني بتألم
وكلي سكات
انا مسافر
عشان لازم يكون بينا
كتير مسافات
---
لا عمري شربت كاس خمره
لكن ياما يا خلق سكرت
ولما الحاكم الظالم
أمر جلاده يجلدني
انا استحملت
بكي الجلاد وانا ما بكيتش
وما اتهزتش
ولا حسيت
واول لما فوقت بكيت
وأخر جلده حسيتها
انا أتألمت
(4)
يا جلد الذات
انا استحملت بكفايه
يا خلق ياهوه
يا موس مسنون فـ برايه
يا أبعد ركن فــ البلاتوه
يا تعلب فات
سبع لفات
انا مسافر
عشان لازم يكون بينا
كتير مسافات
---
وطول عمري بقول حاضر
وبرضي يوقفوني الجون
وعمري فـ مره ما لعبتش
كراس حربه
فكان لازم
اكون احسنها جون فيكي
واصد فـ أيها ضربه
وراحو الكل
وفضل الطوب كما هوا
خمس ياردات
وريحة عرقي والشرابات
وكام ورقة شجر واقعه
وصورتي ورجلي ع الكوره
ونور بيطُل
--
(نهايه)
يا جلد الذات
بحق الذكري جوايا
ما تمحينيش
انا فاضل فتات فيا
لكن بيعيش
بحق النور
بحق اللي فضل مني علي ده السور
بحق الشارع الضلمه
ونهدة قلبي والدقات
انا مسافر
عشان لازم يكون بينا
كتير مسافات
....
