الغريبة
كل حاجة بقت غريبة
حتى كونك مش قريبة
حتى صوتك
حتى صورتك
حتى إحساسي بإنك مش غريبة
والغريبة يا حبيبتي أن حُبك إتهام
"اللي خلا الأرض خضرا"
"واللي خلا الدار أمان"
واللي سارح وسط زرعي
واللي طارح ف الغيطان
بقى يا ستي ويا حبيبتي
رجس أسود م الشيطان !!
حجة فارغة
وأمر واهي
لأجل ما تزيد التلاهي
ولأجل ما يضيع الكلام
ولأجل ما تكون الحكاية
سكة فاضية من النهاية
أو رواية من البداية
بيحتضر فيها الكلام
وده اللي داير م الكلام
وده اللي حاصل بالتمام!!
وده اللي خلا حبك إنتِ
أيوه إنتِ يا حبيبتي
بقى قضية وإتهام
رغم توضيح الكلام
والكلام مالوهش معنى
وسط وضع مالوهش معنى
والوجود إن كان له معنى
يبقى مطرح للسلام
والسلام بيحب كونك
قطف وردك من غصونك
يحيي روحي من جروحي
تبقى غنوة
يجوز بتحلم
بس حلمي مش كلام !!
وقصر الكلام
أنا قلبي عاشق
والعشق غيه
وكل عاشق وله بهية
وكل فرح وله صبية
وكل طير وله حنين
يا حكاوي الفلاحين
يا غناوي الصيادين
يا أدان كبر ف قلبي
واتولد منه الحنين
مش غريبة إني أحبك
حبي ليكي مش حرام
حبي ليكي من البداية
شيء جميل مالوش نهاية
شيء تمللي يحب بكره
وكل بكره وله حكاية
وكل معنى وله رواية
وكل عاشق وله مرام
وأنت المرام
وأنت الغرام
وأنت الصبية
وأنت البهية
وأنت الهموم
وأنت السلام
وأنت الحقيقة لو يعرفوا
راح يفهموا معنى الكلام
ده أنت البداية في كل شيء
وأنت النهاية ومسك الختام
