أهل زمان
محمد السيد عزيز
أهل زمان
وكانو الناس زمان أنشف
فـ وقت الجد
وأطري م الطري نفسه
فـ وقت الشد
وكانو الناس زمان اجدع
كده لله
ما عرفوش زينا ابداً
فنون الخبث
ولا التدليس
ولا راحو لـ فـصول إبليس
يعلمهم خساسه وقُبح
وكان اذا فات
جدع منهم
علي معشر حريم قاعدين
تلاقي عينيه فـ نُص الأرض
وان لزمت ساعتها يكُح
ضروري يكُح
وكانو كمان
حريمهم أحلي م المحلا
يزيدو حلاوه لو بكسوف
ولف ملايه فوق لكتاف
يضيع الحلو لو مكشوف
وكانو كمان
ينادو بعض أهل زمان
يا خلق يا هوه
فُلان عيان
تلاقي الحاره برجالها وستاتها
يزورو فلان
يا خلق يا هوه ..
فلان عدمان
تلاقي الحاره بفقيرها ومحتاجاها
بيدو فُلان
ده كان حالهم يا خلق زمان
وده حالنا سنة 2000
يعيشو هما مهماً كان
نعيش احنا ..
لغاية فين ؟
