سبوت النور
محمد السيد عزيز
مزيكا بتتسرسب عتمة
كما ليل خلاب
بـ آلات وتريه بتسردلك
م المُر عذاب
لملمت الفاضل من جوفك
وطرحته الارض
هديت الضوء اللي فـ أودتك
وبدأت العرض
واكمن الضوء جاي من ضهرك
فخيالك بان
ورقصت معاه رقصه ثَقيله
زي المانيكان
ضميته وسكِّنت مواجعك
فـ سبوت النور
طفيتها عشان تخفي خيالك
وعشقت الدور
بس المزيكا بتتكرر
وتعيد وتزيد
بالتالي لقيت كل مواجعك
جواك بتقيد
واتخبطت فكره فـ جوف عقلك
وفـ طرف قفاك
ان انت ضروري وشئ حتمي
محتاج تظبيط
للنور اللي ينور لكن
جاي من جواك
