.. فوانيس ..
أمير لبيب
لما عيال الحى تقرر
تلعب كورة فى قلب الشارع
يبقى الشارع .. اصبح جزء من التكوين
و احنا الجيل
اللى اتعود لعب الشارع كدة من صغره
اخر جيل
حافظين كل تاريخ الشارع
و الشارع حافظ اسامينا
اخر جيل
كان يتمنى فى يوم العيد
يلقى الشارع لابس بلدة جديدة
و حضن جديد
بس الخوف
بعد ما جيلنا يروح مايجيش
يبقى الشارع شخص غريب
ــــــــــــــــ
كنت تلاقى الشارع
ناقص حاجة مهمة
لو كان غايب عم فانوس
بياع حمص
او بونبونى
او شوكولاتة
او بلالين منفوخة سعادة
كان بياع الفرحة الطفلة
كل زباينه كانو عيال
.. كان يشبههم
.. عم فانوس
مرة ادانا كورة بلاستيك
بس ضعيفة
نلعب حبة
بس عشان حواديت الاولاد
دايما فيها حد خبيث
كان مسمار محدوف فى الشارع
ينهى الماتش بدون صفارة
جالنا و قرب عم فانوس
كنس الشارع
و حدف كورة جديدة كمان
عم فانوس للمرة الاولى
.. باع الفرحة و ليها ضمان !!!
ـــــــــــــــــ
كان يشبه عواميد النور
واقف دايما تحت البيت
يرمى طفولته فى قلب وشوشنا
فتطرح نور
رامى جدوره على الاسفلت
اصبح من تكوين الحى
عم فانوس طول ماهو موجود
الليل صاحى ...
النور حى .....
... احيانا كان يشبه اسمه
يبقى كأنه فانوس بينور ليل رمضان
رغم خلو الشارع منه قرب الفجر
كنت تحس الدنيا أمان
ــــــــــــــــ
و احنا كبرنا و انا مش فاكر اخر مرة
قابلتك فيها يا عم فانوس
اخر مرة اتمدت ايدى بربع جنيه
عاوز حبة من اللى معاك
.... امبارح .. بالصدفة البحتة
لما قابلت اصحاب الشارع
تسمع ميت مليون تنهيدة
يا ابن الايه
... كنت رفيّع و انت صغير
و الله واحشنى
و انت جمال ..
نفس الشكل و نفس الصوت
أحمد فينه ؟؟
قالوا دة هاجر
.. يوسف فينه ؟؟
قالوا اتجوز برة الشارع من سنتين
صفيت يعنى علينا القعدة ؟؟
ضحكوا و سكتوا
.. بعد سكوتنا لقيتنى بقول
البقية فى حياتكوا
.. قالوا فى مين ؟؟
رديت انا ... كل الفوانيس !!ـ
