ازاي هتقدر تعدِّلك ؟
محمد السيد عزيز
ازاي هتقدر تعدِّلك ؟
نسمة هوا
بتجر انفاسك بعيد
فتسيب فـ مطرحها انتظار
مع بين قوسين حبة ملل
مع نظرة حاده بتحُصُرك
جوا الجدار
لسّاك وحيد
والبحر قدامك مدد
والموج بيرفع شهقتك
فيردلك
طريقين سَدَد'
وبرغم ده
لساك بطل
لكن يدوب
جوا عينيك الضيقه
وف بعض عينهم للأسف
تلقاك كـ حيّز م الفراغ
ملضوم فـ احباطهم كما
دودة فـ قلب الشرنقه
فـ ازاي هتقدر تعدِّلك
جوا العيون؟
وازاي تكون ؟
مع انه اصلاً مستحيل
تتساوي أنظاركم فـ يوم
فكفايه لوم
وكفايه قسوه لجل ترضيهم ومش
هتنول رضا
حُكم القضا
ساري وبينظم بشر
قسم قلوب زي الحجر
وقلوب مافيش
وقلوب يدوب تقدر تعيش
وقلوب تدوب لجلك ولا
هتحس يوم
فكفايه لوم
بكفايه لوم
