"لحد ما يروح الصداع | محمد السيد عزيز

ده مش سيناريو فيلم
ده نص أدبي
او نص نثري
او نص بس

طب ليه ما قولتش قصيدة
طعن الخناجر طالني
من ورا الأبواب
وانا ابن عمي مش علي
ولا جدي عبد المطلب
ولا ليا حد الا التراب
انا من تراب
ماليا ضهر ولا أتراب
والباب بقفل مصدي
بينكسر
بالنظر الحادة
والقلوب الجاحدة
والقسية
وقلبة الاحباب
..
-انا مقدر ظروفك
-بس حاول ترجع بالزمن اكتر لورا
يا دكتور
اانا ورا من زمان
-يبقى معادنا الحد الجي
اسمحلي اقولك
انت بجد انسان
..
دلوقتي احنا في مرحلة
ضحك البكا
الدمع ده من عزم الضحك
ولا من عزم (الدوكا)
الضحك ده م اللاشئ
م الضيق
م الخنقه
م الشعلقة
م الدربكه
م الموت
معذور يا خِل الوحدة
كلك على بعضك ما فيش
الا من نفسك
وبقايا روح
وبواقي ريش
ليلاتي تزعق بعلو صوتها بلسانك
"انا موجود"
"انا موجود"
بس الصدا بيرد على قلبك
"تعيش"