شبيه الطفل
محمد السيد عزيز
شبيه الطفل من جوا ومن بره
ما حبش نفسه طول عمره ولا مره
شبيه الطفل احاسيسه
تمللي بتبقي مضطره
تنّقي اللي بترتاح لُه
فتفتح لُه
تبوح لُه بكُل اسرارها
شبيه الطفل ارواحه تحوم فـ الليل
تحب الليل .. وتعشق ليل
تبات ف الليل ولا تنامشي
شبيه الطفل من صغره
يحب الشمس ما تبانشي
ولسه مصدق ان الشمس يومياً
بتغرق جوا ذاك البحر ..
شبيه الطفل من صغره
يحب البحر
لكنه بيكره الموجه فـ عز الحر
ويعشق ثورته فـ نفسه فـ وسط الغيم
ويتمني يدوب فـ الحضن مش ع البر
شبيه الطفل عاش دايب ومش دايب
شبيه الطفل يتملِّك يقوم سايب
شبيه الطفل مش عايش عشان حابب
لكن عايش عشان خايب
عشان مضطر .
شبيه الطفل كان راكب علي العجله
يبدل سطر ويفوت لُه مليون سطر
يعدي السطر ما يبُصش فـ يخبطه قطر
فيـقضي الأمر ويفلفص يموت م الخوف
يشوف الامر فيبان كله ع المكشوف
ولما يشوف بشر يبقي يا إما عبيط
يا إما مات وآخوانه رموه في القبر
يارب الصبر من عندك
يارب الصبر
