جايز
انتصار الدمع ع الانسان
وانهزام الفرح للاحباط
واندثار الشمس في البهتان
وانكسار الشعب للظباط
خلانا نتبعتر جزايل جزايل
نبعت دموعنا
للي سبقونا ف رسايل
لانها اصعب الطرق
واسهل الوسايل
هذي الرسالة التالته بعد الصفر
وانا لسه واقف عند نفس الصفر
وانا لسه ببكي عند نفس البير
يوسف لقاه العزيز
وانت اخترت الرحيل
"هَل عَلِمتُم ما فَعَلتُم بـيوسُفَ وَأَخيهِ"
قالو احنا ما عملناش
جه الديب يبرأ ذمته
رابط دماغه بشاش
طول الجنازه بينتشي
بالدمع والتنحيب
طيب يا عم الديب
سيبنا وما تاكلناش
..
اكيد مكانك اهون من رتبة وزير
هناك حقيقه مطلقه
وهنا العرض الكبير
واحنا زهقنا حقيقي م التأخير
وانا لسه ببكي عند نفس البير
يوسف لقاه العزيز
وانت اخترت الرحيل
..
القناة الخامسة
مذيعه تبلغ ارزل العمر
بباروكة شقرا وكم م المكياج
عامل "ميوت" وبدأت بالدوبلاج
:
سيداتي آنساتي سادتي
بعد حبه من الزمن
تنتهي الحياة علي الكوكب
"يا بُني اركَب مَعنا"
قام قاله مش هركب
فاصل غنائي ف فقره مفتوحه
للمطربة كوكب
بالموف الهاند ميد
عشان الاحداث
والتايمر اعلي الشاشه
بيعد في الانفاس
والناس منتشيه ومبسوطة
وتبخبط كاس مع كاس
وانا قاعد مش لابس حاجة
غير بس لباس
وماحدش كان محتاس
..
اكيد مكانك اهون
م اللي احنا عايشنه
واحنا بنحسدكو
ع اللي انتو عارفينه
هنا المكان ضيق
والقبر فيض واسع
انفاس وبتزّيق
وقت وبدل ضايع
صفاره واحده تريح الحاصل
بس الحكم فاصل
واحنا تعبنا حقيقي م التصفير
وانا لسه ببكي عند نفس البير
يوسف لقاه العزيز
وانت اخترت الرحيل
رسالة العيد1 : http://goo.gl/xGQkOK
رسالة العيد2: http://goo.gl/opUcuF
