بتكسف
محمد السيد عزيز
بتكسف
من غير ما اذوق في الكلام
اجري ع الله وهعترف
من صغر سني ومن زمان
طول عمري بخجل واتكسف
وان كنت اقابل
مدام سعاد
من غير مناسبه او معاد
القاها مش لابسه الحاجات
يحمر وشي ويتخطف
من صغر سني ومن زمان
طول عمري بخجل واتكسف
وان كنت ازود في الوضوح
لابد اقول اكتر وابوح
ما اقدرش اقف فوق السطوح
وجارتنا طنط ام اسماعيل
كانت بتنّشُر في الغسيل
ولا بعرف اسرح في العينين
لا عيون سميه ولا حنين
ديماً ببلم وابقي لوح
ما اقدرش ابص في نني انثي
ولا اقول لموزه انتي موزه
ولا حتي اعاكس وارمي همسه
ولا مره اغمز نص غمزه
مع اني واد صايع مخلص
وفـ اي حاجه انجز واخلص
واشطه - فاكس - وبيس وباس
لكن كمان رغم الهياس
في جوا مني احتباس
ان كان مشاعر او حنين
ما اقدرش ابص في نني عين
وده بس مع جنس الحريم
بضرب في لخمه أوام واهُـــر
واعرق وعرقي كمان يشُر
وملامحي ديماً تختلٍف
يتخض وشي ويتخطٍف
من غير ما اذوق في الكلام
اجري ع الله وهعترف
من صغر سني ومن زمان
طول عمري بخجل واتكسف
