لانك مزيّف ..
محمد السيد عزيز
لأنك مزيف ووهم و خيال
واقرب لكدبة وخم احتمال
لانك لا فيها ولا ف يوم خافيها
ولا حتي منها ولا من خلال
لإنك ميمّن وَبردك شمال
لإن إئتمانك وأمنك مُحال
لإن انتظارك لطلعة
نهارك محاولة عمارك
ف حين انت بال .
يا اتفه براءة ف وش العيال
يا سين السؤال
يطول انتظارك لرد الجواب
يا واقف ف دورك
يطول انتظارك علي فتح باب
يا ماضي لحضورك
يطول انتظارك , تُسجَّل غياب
يا ماضي ف شبابك
يفوزك عجوزك ويبلي الشباب
يا عايز وعوزك مأخر ف فوزك
يطول انتظارك ليوم الحساب
(نوقّف .. و .. هُدنة )
مؤكد هتوصل وتحصل وتبقي
مؤكد هتفضل وتعتِل و تشقي
مؤكد مؤكد
مؤكد مؤكد
هتوصل لآخر سطور ف الكتاب
يا تُصدُم ف فولك يا تلقي الكباب
مؤكد مؤكد
هتحضر وفاتك وهتعزي فيك
وتسمع صويتهم ونوحهم عليك
مؤكد هتضحك ويغمن عليك
مؤكد هتسأل
مؤكد تجاوب
انا اللي ف حضوري مغيّب تملي
بتبكوني غايب ؟
فتلقي
جوابك
أخيراً ,,
سؤال !
لأنك مزيف ووهم وخيال
واقرب لكدبة وخم احتمال
لانك لا فيها ولا ف يوم خافيها
ولا حتي منها ولا من خلال
