على غير طبيعتى
----------------------
على غير طبيعتى
ف الكتابة
باخاف و تهرب
ل إستجابة
من الحروف و الوزن
و موسيقى الكلام
لما بابدأ مرة أكتب
عن شعورى ناحيتك
يمكن عشان
أنا مهما قُلت ...
هاييجى موش قد المقام
و ساعتها موش هاقدر
على لوم الضمير
و لا ع العتب
و لا ع الغضب
و لا ع الملام
أصلك حبيبتى
موش كده
صفة سائدة
زى الألوف ف الدنيا
أنثى و السلام
أنا فيكى شايف
كل سحر الدنيا
و الخير و الجمال
الحسن لما بيختلط
ببحور دلال
الشمس لو تتوضَّى
من نبع الظلال
و تبوس خطاوى مشيتك
على سقف قبة دنيتى
عند الغيام
أنا بيكى باشرح للسؤال
معنى الإجابات بالخيال
و أنقش على خد الندى
لون الورود
تنثر عبيرها على الآنام
و أستودع الروح كل ليلة
بين كفوفك
لا جل لما أصبح أشوفك
و أبتسم و أدخل أنام
على غير طبيعتى
ف الكتابة
باشوف حروفى كمان
غلابة
و عاجزة حتى عن الإجابة
لما بتشوف إتهام
أصلك حبيبتى
بدون مبالغة
موش عادية ...
أى أنثى و السلام
------
طارق العمرى
