ورق كوتــشينه
قعد وسطهم علي الترابيزه
وبدأ يوزع الورق
تلتاشرات
من شدة الدوشة وم الهيصة
ماحدش خد باله من الوجع
ولا م العياط
..
شفافين
زي الهوا .. والحب
من غير اثر ولا حتي صوت ولا دب
من غير ضجيج
من غير وجع ف القلب
لكن وجعنا البكا
والهم والاحباط
..
منسيين
زي مواعيد الدوا
وتسريحة الشعر
والمذاكرة تمللي اخر شهر
زي النواح والبكا من غير سبب معلوم
زي الوجع
للوجع
والالم للألم
والهموم للهموم
زي انتصار الصمت اخر اليوم
والحكمة في الانصات
لكن وجعنا البكا
والهم والاحباط
..
حلوين
زي دعوة الامهات ساعة الصلاة
روح"
الهي يبعد عنك البلا
وهم البال
وتُقل الروح
"الهي تنجلي عنك كل الجروح
بالظبط زي ما بين العصر والمغرب
كل القلوب حلوة
كل البشر مركب
كل الوجع ف الشمس الجاهزه بالموكِب
كل البشاير في القمر , هتهل
واحنا غيابنا حبة حبة يقِل
زي النسايم نلتقي ف الضِل
ونكون لقرص الشمس بالمرصاد
ما يهمناش ولا بكا
ولا هم
ولا احباط
..
قعد وسطهم علي الترابيزه
وبدأ يوزع الورق
علي كل واحد بالتمام
من شدة الدوشة وم الهيصة
ماحدش خد باله انه قام
