هذي الدماغ تشبه
فنجان بن محوج
مستكه مش حبهان
طول عمري لا احبه ف اكل
ولا تحت لسان
طول عمري احب السرمحه
كداب
انت بتعشق الانزواء ف البيت
تحت الغطا
و ع السرير
تحب ريحة البيت
وشمس العصر وهي بتودّع
وبتسلم خيوط الشمس للمغرب
هذي الدماغ تشبه لسعة المناكيش
من غير لا تبغ
ولا حتة حشيش
في الصباح
الناس بتصحي لشغلها
يصحو العيال جبراً لمشوار العلام
العلم نور
كام واحد اتعلم والعقل جواه بور
كام حد ما اتعلمش وبقي معلم
لسه الحياة قدام
هتشد فيك وتشدها
مصارعة حرة شديدة الاحداث
ملهلبة
والفرجة فيها بلاش
للعلم يا استاذ
يطلق لقب حشاش
علي كُل من يضحك في افظع الاهوال
بالظبط زي ما يعملو المناكيش
هذي الدماغ طازه
لا سجارة ولا تشيِّش
نرجع لموضوعنا
طب هو ايه الموضوع
يا عم سمّي وابدأ الجلسة
مفتتح/وسط الصفحة
العالم كله مجاز
مع كل دلايلة الواضحة
والدنيا طبق قلقاس
طازة ولساها مصابحة
كل المانيكان في ازاز
بيرقص طيـ* وبـ***
وماهوش ثابت .. هزاز
وبيضحك ضحكته فاضحة
القصة ماهيش القصة
يبقي انت قلبت الصفحة
او خدعك شكل أفيش
ودماغنا العالية طبيعي
من غير ايتها حشيش..
نرجع لموضوعنا
تاني نعود علي فين ؟
علي قبلنا بحبة
يجي قبل عام الفين
بألف وبحبة
كانت قلوب الناس
تنشع صفا محبة
لكني ما اقدرشي
اجزملك الأنباء
وارد قصص جدي
والسيد الحلاق
والحلم يا سيد
مش سيد الأخلاق
....
..
تفتكر
نفس الزمان لو عاد
مع بعض يعني التعديلات
كات تبقي هي هي دي الأحداث
ثورة تسعتاشر
وسعد
ولانجليز
والملك
والانقلاب
"طب بس ما تقولش انقلاب"
طب تفتكر
لو نفس الزمان اللي احنا فيه
يجري ويدور
وعجلة الاولاد تدور
ويفوت متين ضلمة
وتسعمية بـ نور
ويجونا احفادنا
لجل يسمعو الحكايات
فنبص بصة الخُبرا الطلاينة
وبعد تنهيدة وبصة للمافيش
هنقولهم
هذي الدماغ لاسعة
كما لسعة المناكيش
من غير جِوَز وحشيش
نرجع لموضوعنا
الايد دي بطالة
تبقي ايدين نجسة
والايد دي شغالة
تبقي ايدين غِلسة
والايد دي ممدودة
تبقي ايدين حاسة
والايد دي مشدودة
تبقي ايدين حابسة
والايد دي ايدك ؟ لأ
طب كات ف جيبك ليه ؟
طب لجل قول الحق
لجل القلوب والتيه
لو شوفتني بتزق
علي العجل , فسيه
وان شوفت جيبي مشاع
بالله عليك غطيه
لينط منه السر
ويكُر سِر ف سِر
ويكُرني بعديه
بالله عليك يا جدع
لو شوفت مني حاجات
ما تقولها يوم لشاويش
هذي الحاجات , عادي
مش من جــِور وحشيش
..
نرجع لموضوعنا
الدنيا بار وقمار والعب , ما تكسبشي
واله رحيم ستار , يستر , ما يفضحشي
والشعب موت يا حمار, بيفوق ؟ ما بيفوقشي
والقاهره والنيل , والليل , ما يرحمشي
والشارع الغلبان , بردان , ما يسقعشي
والناس ولسه الناس , تنداس , ما تطلعشي
والجوع طويل وتخين , ياكُل ما يسكتشي
قوم واذكر الرحمن , قوم سخن المحشي ..
واسكت لعل العود
بيبل وجناتنا
واذكر لعل الله
هيخف اوجاعنا
واحمد لعل الحمد
هيعلي جناتنا
واتغطي بدري ونام
ساكت
ما تحلمشي
محمد السيد عزيز
