انا ما اكتفيتش بدعوة الوالدين
انا ما اكتفيتش بحبك الغضبان
فيا الشيطان لابس كما الصالحين
قطر وبيكره سكة القضبان
يعني انت مين ؟
انا م العدم وإليه
بيرك غويط
ما تفتحوش .. غطيه
بحرك غريق
لكن بسيط وعبيط
خلقك يضيق
وف ثانيه يبقى محيط
انت الأثر ؟
ولا انت ضل ؟
ولا انت اصل الصورة وانت الخِل
انت المتاع ؟
ولا الضرورة اللي اقتضت حق انتفاع
انا البسيط اللي ابتسم للطفل
انا البسيط
انا ضل حيط
فاتت عليه البنت وقت البعتره
كفوفي لمت بعضها وسط الحطام
ما اعرفش شهم ؟
ولا انت غاوي المنظرة
وقت اما احب
انا المحب .... و العاشق الولهان
مع ان صورتي ف ازاز البيجو
مشرخه .. زي مرايات البيت
انا ؟
انا البسيط
انا ضل حيط
انا ابن ابويا ولا ابويا ابني ؟
دفنوه وقالو كل شئ مفني
انا ابن ابويا ولا ابويا سراب
دفنوه وقالو كل شئ لتراب
انا ابن ابويا ولا ابويا بعيد
دفنوه وقالولي انت ضل الحيط
ومشيت لحد ما ورّمِت رجلي
السكه فيها منيتي وخلي
وأُمي زي عامود لكن اجدب
وانا اللي قايم ولا انا الأحدب ؟ ..
شكراً ..
ملخص ما مضى
إني
مليان شغف
لكّين لحفه تراب
جسمي المُهدل بالدهون والكِرش
بقى بس ايد
متشعلقة بالباب
وانا من تراب يا سيد الأكوان
وانت العظيم .. والمنتقم رحمن
انا ما اكتفيتش بدعوة الوالدين
انا ما اكتفيتش بحبها الغضبان
فيا الشيطان لابس كما الصالحين
قطر وبيكره سكة القضبان
