لوكاندة في الدور الستاشر
محمد السيد عزيز
قالي تشرب ايه
قلتله تقيل سكر زيادة
قاله مليان في التقيل
جلست حيث المنظر سينما
مشهد بيجر التاني
ونهار بيكُر ليل
واكاد اجزم
ان الشارع
لم يحوي الا مسافر
ومنادي وتباع
واشارجي وبياع
داخلين في سباق
ف شريط القطر
و شريط العمر
وف اللقمة
وف حسب وداد
وبنات
عينيها متشعلقة بفتارين
وولاد
عينيها متشعلقة ببنات
وبلاد
عيالها متشعلقة بنهدين
وعساكر
مشعلقين الكل ف ترحيلات
وانتي
بعيد بعيد
عند القنال كده او بورسعيد
عند البحر والمينا , واللهجة الغريبة , والبراح والعيد
وانا
في لوكاندة في الدور الستاشر
كشفالي حبل الصراط
لم ينجح احد في دخول الجنة
غير اللي قضي الليل عياط
..
الشاي بردان
وازازة الماية زي ماهي بالبرشام
وناس بتحلم تموت
وناس بتحلم تنام
وبيوت
غطت ع الشجر
فاتخنق الهوا في الجاكمانات
واقتصرنا النفس علي وسط البلد
والمشي ف دواير واسعة
واللف ف طرح البنات
.
شارع شريف
لم اكتشف اسمه
الا بعد حبة من الزمن , ماشي
نور الكلوبات علي البشر غاشي
ومطاعم اكتر م البطون
واغلي من بصة ف عينين الجعان
سعي بيجر سعي
ميت سند عيان
هنا المكان
اضيق من الطاقة
واوسع من الادراك
هنا التقاء اللوكال والهاي كلاس
هنا ارتباك
هنا التبس ف مطاعم شيك
والفصال ف جزمة اغلي م المشوار
هنا النهار والليل اسرع من المتعة
وابطء من النوم من غير عشا
وحلم الفطار
وانتي بعيد بعيد
ناحية القنال كده او بورسعيد
عند البحر والمينا واللهجة الغريبة والبراح والعيد
وانا
في لوكاندة في الدور الستاشر
كاشفالي حبل الصراط
لم ينجح احد في دخول الجنة
غير اللي ساب للريح بلاط .
