مِشمِش .. و مِش
محمد السيد عزيز
الي كل من غطي عيب شافو فيا
وخباه عليهم وقالهولي وِش
الي كُل ايد طببت فوق ايديا
الي كُل رافض خداع وللا غِش
الي كل تايه معايا ف زحام
وسايب لي طوعاً زمام الزمام
الي كل قاري ف كلامي السلام
سلام ليكو جمعاً .. سلاماً ومِش
ومِش راح اسيبكم ولا اهد عِش
ولا للحظه هبعد ولا اخلف ولا اوعد
ولو كنت هسعد فهسعدكو وِش
سلام ليكو جمعاً سلاماً ومِش
ومِشمِش .. ومِش
سلام للي طنشني وقت اما عوزته
سلام للي طنشته وقت اما عازني
سلام للي لصمني وقت اما شافني
مكسر مدشدش مافياش سليم
سلام للكريم واللئيم المفتّح
عليا ومقفل مع الخلق تماً
سلام للي غمّي وقام شافني فتّح
سلام للي فتّح من السد غيه
وطبطب عليا وسلفني قِرش
سلام ليكو جمعاً .. سلاماً ومِش
ومِشمِش .. ومِش
سلام للمغفل عشان مش عبيط
سلام للطيابة عشان مِنُّهم
ابويا اللي عاش لي ومات لجلهم
وسابني مكمل في ضلك يا حيط
سلام للي طعنوه في ضهره بخناجر
سلام للحناجر يا شغاله سير
سلام للي بايع في قلبه وتاجِر
سلام للي ذاكِر لُه ديماً بخير
وجاب سيرته خير .. ودمّع ومِش
سلام ليكو جمعاً .. سلاماً ومِش
ومِشمِش .. ومِش
سلام للي كُرهاً تركته في طريقه
ف سلم وراح
سلام للي بكيتُه رغماً بإيدي
ف طبطب جراح
سلام للي فضفض لي مره بعذابه
فزودته ليه
سلام للي ديماً بندل معاهم
ولسالي جوا ف قلوبهم براح
تساع كُلي كُلي .. وويايا كِرش
سلام ليكو جمعاً .. سلاماً ومِش
ومِشمِش .. ومِش
