آخِر نَفَس
محمد السيد عزيز
اخر نفس
اخر سيجارة منفَّسه
ف العلبه دي ..
اخر شوية حبر جوا ده القلم
اخر ألم
راح ارسمه ع الورقه دي ..
اخر حاجات ديماً بتبقي مؤلمه
اولها جايز يبقي ممتع لك كتير
طب احلي بوق فـ مج شايك تفتكر
كان اولُه ... وللا الأخير ؟
اخر ساعات فـ وداع حبيبه سيبتها
تفتكره اكتر ولا اول يوم لُقا ؟
يوم الوداع ابشع من انه يتنسي
ومهما طال تلقي روايحه معبقه
اخر ساعات ف وداع ابوك قبل الممات
تفتكرُه اكتر ولا يوم جيت حضرتك !!
المُخ خزن ذكري فرحك يوم ما جيت
ولا مسحها وبس ساب يوم خضتّك !!
اخر ساعات ليك فـ الحياه دي ..تفتكر
راح يفتكرها بعد موتك مين ومين ؟
سؤال غريب لكن هجاوبُه لحضرتك
انسان ومات .. ويعيشو بس , النسّايين ..
