رسالة العيد II
محمد السيد عزيز
يا ابه البشر ملّو رسايلي إليك
لو بس حسو اللمسة من ايدك
لو كانو شافو الدنيا جوا عينيك
كانو ابتغو كَتَبه لمراسيلك
يا ابه البشر حاسين ومش حاسين
يبكو وثمّ , يضحكو فجأة
يابه انا زيهم بضحك وببقي حزين
وابكي ولو جوايا 100 ضحكة
يا ابه البلد ليه ماعدش فيها براح ؟
ابعت سؤالنا للسما وجايز
توصل اجابة او ما توصلشي
غير البراح يارب مش عايز
يابه الكلام طوّل فبمستسمح
العيد ده فرحه وانت ادرا بي
يابه الفرح ما بقاش يخبّط لي
ما بقاش يصلي جوا محرابي
يا ابه الوجع هوا اللي وصلني
اني ابقي شايفك زي ما تكون حي
صدقني وانت اكيد مصدقني
انا كل يوم العصر فاكرك جاي
واسأل ساعات لو كنت عشت سنين
ومت يعني , يعني بعد الشر
قول يجي بعد سنين من الجايين
كان حزني يفضل بردو نفس القْدر ؟
يارب ببعت جوابي لقدرتك فيا
هوا قدر .. والموت قدر , وشديد
استغفرك , مش شبه ألوهيه
لكنه مش ف العرف رب البيت ؟
يارب ببعت سلامي للي بات عندك
بستأذنه ف ضحكاية ليلة عيد
