عن آخر خيط بيفضل في العلاقة الانسانية
أميرة هشام
عن آخر خيط بيفضل في العلاقة الانسانية قبل ماتخلص
العلاقات الانسانية ممكن نشبهها بالخيوط اللي بتوصل بين شخصين .. واللي مع الوقت الاشخاص فيها بتفضل توصل خيط وتقطع خيط وتشد خيط وترخي خيط
وتفضل الخيوط رايحة جاية .. خيط يتقطع في خناقة ويرجع يتربط تاني بعد الصلح
خيط يتقطع بالجفا وميتوصلش تاني
خيط يتربط وخيط يتقطع وتفضل العلاقة رايحة جاية مع الخيوط
لو في يوم العلاقة اتأزمت اوي وفضل فيها خيط واحد
الخيط ده علي اد ماهو ضعيف بيحمل معاني كتير اوي .. في كل مرة يجي يتقطع الاتنين بيخافوا يقطعوه ، عشان اخر خيط بيتقطع في العلاقة بيبقي مؤلم اوي
الخيط الضعيف بيفضل مع كل سلام بيصمموا يسلموه علي بعض لما يتقابلوا ولا يفارقوا
الخيط الضعيف بيفضل لما يتحاملوا اوي علي نفسهم عشان يبتسموا في وش بعض
وسعات الخيط الضعيف يقوي حبة لما يقابلوا حاجة تفكرهم بعدد السنين اللي عرفوا فيها بعض
هما مبيبقوش عايزين يقطعوا الخيط الضعيف ده مش عشان عايزين يحافظوا علي علاقاتهم بالبشر ده عشان مبيستحملوش الألم
صعب أن حد يستحمل ألم آخر خيط بيتقطع في العلاقة
بس مع الوقت حد فيهم بيقوي عن التاني فيقرر يكابر ويقطع آخر خيط في العلاقة ويمشي وهو منتصر بلحظة قوة اقتنصها ويسيب التاني للألم والمفاجأة والغدر
المجد لعلاقات انسانية لم تبدأ لتنتهي
المجد لبشر لم يأتوا ليرحلوا
المجد لحكايات لم تحدث كي لانحكيها أو نكتب في آخر سطورها كلمة "النهاية"
