من غير تقديم
وبشكل مباشر للموضوع
أنا صاحي يجيلي بتاع اسبوع
ومارست طقوس تحضير روحك
.. وفشلت
مش عارف غبا مني
ام إنه تجاهل منك للقايا
طب سايب منك ليه معايا
ليه جتلي ف اخر مره و اتبسمت
.. ثم مشيت ..
سيبك مني , اتعشيت ؟
انا عامل قضلة خيرك جبنه قريش
دخان ؟
ماعييش
انا حارق يجي أروسه فـ يوم
لأ .. مش طالبه بـ نوم
خليك حبه وادينا قاعدين ..
بتقول بتقابل مين ؟
معقول ؟
انا لسه مقابل ابنه امبارح
ودعالك دعا بالكوم ..
معلش الجيب مخروم
وانا بطلت ادعيلك زي الاول
انت عارفني , بنسي بسرعه
بس بطوّل
كله تمام والامتحانات ع الباب
انت عارفني بذاكر اخر وقت
عاده هباب ..
قصدك قد الباب
اصل انا كل ما بزعل باكُل
من باب التكدير
يعني .. كتير ..
لا خليك
طب لو عوزتك تاني اناديك ؟
بكره كويس ؟
يبقي معادنا الساعه اتنين بـ تمام
بعد ما كله يخش ينام
الله يعزك .. الله يخليك ..
سلام .
سلام .
محمد السيد عزيز
