وعمار يا بيوت
عود اخضر خالي وفاض , بيموت
مش راح يلحق , بكره هينهار
عود اجدب لكن مليان توت
وعمار يا قلوب الناس يا عمار
وعمار يا بيوت
وسؤال مستني جواب يتقال
وجواب لكن , مستني رسول
وعينين اتلاقو ف شارع ضلمه الشارع ضلمه اتحول نور
وعيال اتلمو اتغطو ونامو بهمس بابور
وبيبان بتقفّل قبل الساعة اتناشر
وقهاوي مفتحّة ليل ونهار
بتنزّل مشاريب بالمظبوط
وعمار يا قلوب الناس يا عمار
وعمار يا بيوت
والعجز ملفح كل رقابي الخلق بسيف
لو فلفص حد يسن سنانه
فمافيش حد اتحرك ف مكانه
كله استسلم , وبشكل مخيف
وعيال بتحب تهزر تضحك زي الورد
وبنات بتدفي الصدر بنظره ف عز البرد
لو وقف السِن وضلو يحبو الضحك
كان كل العالم نوّر زي الشمس
كنا نبيع نور
لكن العيا
والسِن
ووصل المية وكشف النور
بتخلي الضحكه الجد تغور
دستور يا اسيادنا , كمان دستور
دستور يا عيال وبنات وبدور
ضحكتكو الحلوة ما هيش دايمه
هتلف الدنيا وتقلب زار
تتحول ضحكتكم لبرود
وعمار ياقلوب الناس يا عمار
وعمار يا بيوت
