مرحب رفاق الدرب
محمد السيد عزيز
مرحب رفاق الدرب
من فاقدين الأب
ياللي عيشتكوم كرب
بتزقو فـ الأيام
بالذمه ده اسمه كلام ؟
دغري علي الموضوع
يا قلبنا الموجوع
من فرقه مالها رجوع
وطريق بدايتُه آلام
بالذمه ده اسمه كلام ؟
القصد من ده الك
ايه عاد بيبقا لك
هل دق حد الباب ؟
غير زهد فـ الأحباب
من خوف فراق محتوم
يا صرخة المكتوم
يا دمعة نازله بحك
تدمي فـ جدار اليوم
والقصد من ده اللك
اليُتم صعب صحيح
لكني مش يتمّان
انا ابويا مات بصحيح
لكنُه عاش علشان
ساب فيا حب كبير
والطيبه والتأثير
لجل أن كرمه كتير
ساب فيا روحُه كمان
