ترتيل الروح
محمد السيد عزيز
ترتيل الروح
بارادة روح
من غير أجساد
وبنزع الجسم من الشهوات
ومن الامكان
ومن التموين
غير بس يدوب امكان تدوين
هذي الكلمات
نبدأ نكتب
ونقول ونبوح
من غير اجساد
بارادة بس الباقي يدوب
من رمق النفْس
وبعض الـ روح-
----
يا سايبني سنين فـ الوحل بغوص
انا غوصت خلاص
مش باين من جسمي المنحول
غير بعض الراس
بسمع وبشوف
وساعات ببكي
واشتاق اوقات واحتاج اشكي
ما القاش ودنيك
فبنادي عليك
يمكن يتلاقي الشوق مع شوق
لكن كالعاده ما بتردش
فالحاله تسوء
-------
سايبك مغصوب
مش بارادتي
انا جين الشهوه ملغبطني
يرميني فـ بحره واتوه واغرق
ويزقني تحت اشرب واشرق
ما الاقيش غير اني يدوب الحق
ارميكي عشان اعرف اطلع
فارميكي واتوه وافضل اغرق
واغرق واغرق
----
يا حمار انا طوق
ازاي ترميني فـ وقت المد
لو بس اتلاقي الشوق بالشوق
كان جاز الشد
كان جاز انقاذ
الباقي فـ اتوابي وتوبك
كان جاز توبتك
تلقالها قبول
تلقاها خلاص
ما بقاش فاضل
غير بس يدوب جسمي المنحول
مع بعض الراس
----
سامحيني يا روح
ويا بخت الوحل
إطّهر بيكي واهو اتوضا
وانا اتنجست
وضيني يا روح
من شط الضف
صلي بي يا روح
وانا اساوي الصف
رتلي ترتيل
من بعض آيات سورة مريم
قيدي القنديل
وريني عشان انا متغمِّم
انا قلبي مريض
وببعض آيات راح يترمم
ويرمم فـ بناكي وفيا
ويساوي الصف
---
القلب اهو خَف
----
--
-
