سندريلا
ياسمين الشاذلي
بتفوت سنة
والتجربة خلاط زلط
بيكسر العضم العتيق.
كان الطريق
شبورة وغيوم عالجونلة
ضفايرها شايبة وتلج كاسي الارض
شمسية دايبة من حنين السما
والحلم داب في التلج
الكحل واشم سكة عالخد الشمال
وملامحه ومضة بتختفي وتبان..
ملامح الحلم اللي بتحارب عشانه
كات رمز ثابت في الخطا
بقي ضي خلفي للبيبان..
اشباح بترقص في الدخان
الكحل كمل وشمه طال الارض
الكحل سخن..والتلج مهما ًكان عنيد
قادر بطلة شمس يتولد اللي مات.
انزاحت الخيمة اللئيمة
واستسلمت سلبية القهر اللي معجونة بملامحه
الشمس تغتال في التفاصيل المملة
تحرق جبال التلج بحر أكاذيب لم تدوم
تحرق خيوط شمسية دابت م العفن
ضفايرها واقعة عالجونلة
وشعرها اصبح كاريه..
الكحل ضي برونزي راح تلاقيه
انفخ في جزمة سندريلا
رجّع شبابها اللي اندثر
زمل معاني البرد والوحدة
اخلص لحلمك وابتدي في الحفر
هتلاقي ايزيس ربما جثة اوزور
لكن ساعتها
هتلاقي قلبك راح يطير م الفخر
الحلم أغلي من جبان اتوارى وقت الحرب
الحلم موقف والمواقف تعمل الانسان
انحنيلك وانت رافع راسي بين الناس
وانت فعل يراضي خاطرى
مش مجرد رد فعل وكسرتي ببلاش
انحنيلك ..
لو في عز الحرب روحي كات سلاح
لما تثبتلي ان كل الجاى معاك
يستاهل فعلا يتعاش
لما تثبتلي ان ضهرك جيش ودولة حق
مش بطل ورقي مجرد قيل وقال
شماعته في الغلط الحلال
انحنيلك وارتجف
لو في مرة واحدة بس
ابتديت بالفعل بشعور مختلف
فرّغت طلقة في حلم عَجّز
أو تشد ستاير التلج الرتيب
تنبض بحلم جديد يستاهل الاخلاص.
