أشباح
ياسمين الشاذلي
أشباح الليل
بتنادي ورا الأشجار
سامعة دفوف الظن بتعوي
وخايـفة....
وأنت عارفني
ما اتخلاش عنك
ولا اخونك...
انقسم الحب في قلبي اتنين
حسـاك...
وإيديه بتكتف فيّ
لمسـاك
وعلي جدار ف وسط الدار صالبنى
وحشاك
وأقدامه بتقرب مني
رافضـاه...
واحس القوة اللي في بدنك
تطلع من يدي
تنزل على خده تعلم خلقه
إزاي يصونوك
ما أنت اللي بعدت
وأنا اللي فضلت استنى وأعد
واتحايل على قلبك ياجي
ما يردش
دلوقتي عَرَفت إن أنا مظلومة بإسمك
جيـت
علشان إيه وعشان مين ؟!
عمر اللي يحب ما يهجر زيك
عذبني عشانك واستحملت
فرقتي عنك كات طول الوقت
بتدبح عمري ودمه يسيل
والاقيش مين يلحقني غير الله
صوت اللي بيعوي يزيد ويقرب
وأنا مرعوبة
نظراتك قبل البعد تطيّب خاطري
وتقولّي اصطبري
وتلوشني حية من احداهم أصرخ
وألاقيك بتفوّقني من الحلم
وتاخدني في حضنك
هستنى لإمتى
صوت مفاتيحك جنب الشباك
بس أنا خايفة
تجيني وأخاف افتحلك
وافتكرك واحد م الأشباح.
