عزائي في شفطة القهوة
ياسمين الشاذلي
عزائي في شفطة القهوة
ياحبايبي
ياللي حاضرين جنب قلبي
كل يوم الصبح
بتنفس هواكم
اول مايحكي البن عن حالكم في بعدي
ياحبايبي
ياحبايب ياحبايب
مهما يحصل منكم
قلبي فيكوا دايب
مهما تبعدوا عني وتفوتوني
قلبي يبقي
في سيرتكوا تملي جايب
وان غضبت في يوم عليكوا
القي عيني بتصالحني
بابتسامتكوا تواجهني
ابقي زي البنت
في الكوتشينة مكسوفة
وهو الواد وسيرته الجد معروفة
ويحكي الشايب الحدوتة بالمرة
نخاف انا وانت م النهايات
عشان كانت نهاياتنا كتير مٌرة
ياحبيبي
يامطر عالسكة طارح ذكريات
ياشجر أخضرفي قلبي ياحفيفك تنهيدات
يا إيدين ممدودة م السما كل ليل
خدني عندك
او تعالي باللي فات
خدني عندك
او ناولني الامنيات
ياحبايبي
عيني كل صباح بتنعس
أول مابتطمنها ريحة البن في الفنجال
تخطف السهد اللي حنالي الجفون
وارتوي بالنظرة ليكم في العيون
ونفس الحلم يوميا بيتكرر
مانيش عارفة
دا حلم صحيح دا او يقظة
من قعدة البلكونة نص الليل
لحد القهوة كل صباح
اكيد فيه ارتباط شرطي
يخلي الشمس تتسحب
علي طراطيف صوابعها
تغنيلي بمزاج عالي
ورغم وجودها مااتدفاش
لكن بتدفا بوجودكوا في خيالي
وبين الحلم والتاني
افوق علي اه بصوت عالي
احن بإيدي ع الكرسي
يقولي الكرسي قسماً بالليالي
انا جنبك
لكن خالي.
