نوتة بٍٍِكر
ياسمين الشاذلي
رغم أي قيل وقال
جوا لسه النبض عال
قلبي بينادي ويصرخ
لسه طفل
لسه ه افرح
لسه مستني اللي يخطف
وف ليالي الحب ه عرف
يعني إيه كلمة بحبك
يعني إيه كلمة أمان
حاسة فوران في المكان
والنتيجة الساحة فاضية
نجم مين اللي ه يلمع
نفسي اسمع
صوت سحاب الفرح جايبك
ويشاور لي ع اللي قبلك
واللي قبلك واللي قبلك
انت بس اللي ف عيوني الكون بتجمع
انت وحدك اللي للأحزان بتشفع
نرقص الرقصة البداية
قلبي يتحرك معايا
وبنفس طالع نقولك
عمرنا صبارة قبلك
ياه
لو الأحلام في غمضة عين بتحصل
كنت قبل ما اغمض الرمشين
أجهز كل حاجة
لو ربيع الكون هايدبل
ياسميني راح يطرح له أجمل
وف غمضة تانية من عيونه
سننا يجري يخونه
قلبنا اللي لسه نونو
فجأة ها يعجز ويكبر
وقتها ه اعرف أراوغك
وتلاقيني البنت سكر
قلبي وياك لسه فارس
فوق سواد الرمش حارس
أيوا انا ع الحب اقدر
روحي بكر مهما اكبر
بعرف ازاى قلبك اسحر
وفي بلادنا البهجة انشر
واعزف النوتة الأخيرة كأني عبلة
وانت بس اللي في عيوني
العمر عنتر
