مزيكة الفجر
ياسمين الشاذلي
(1)
بعمل نفسي عصير الصبح
لجل ما تشربني علي الريق
وانا بلسم قلبك م الجرح
وانحت فيك أحلامي طريق
لو افتح عيني ومش شايفاك
بعرف علطول ان أنا جواك
واتمرجح علي نخلك بهداوة
يندهني العمر الجاي معاك
النخل بيطرح لجنين الحلم بلح
وأنا فيك العذرا وضوء وفرح
والصحرا الواخداك م الناس
زارعاك في قلوبهم طيف وناس
لماك من كل اصحابك عقد
لابساك علي صدري ف عز البرد
والنبي لتصون جواك العهد
شجراية فلبي خريف وتطير
ودا واد لما تبص في عينه
تحبه
و تحبه
تعرف ان الله بيحبك
كملايكة بيتقابلوا في عز الضي
قبل مالفجر ينادي عليهم
بلمحك راوي فرق
لحظة تجلي في العلا
ملامحنا طيارات ورق
في التوهة زاحمانا الشوارع
وجروحنا نازفانا قلق
ودا يوم ميلادك رغم بعدك
يطلع لك الحب في نفق
تطفي الشموع من غير ماتيجي
ومشاعري فيا تندفق
كل العبر متجمعة ببراءة فيك
والقلب لساه مصطفيك
مابقاش فاضلي من اللي فات
غير عقد وشوية ورق
(2)
سرحان ..لما تطير جوا الدخان
تعمل قلبي سجاير سوبر
تلسعك الطافية من التوهان
تشرب من روحي حنان الخمر
ترقص ويا الليل عريان
سرحان في البنت الدافية الشيكولاتة
والبار اللي شهد وياها عليك سكران
والسكر بنشوة حب البنت
إيمان
ربنا كان قادر ينهيها
تأويل:
ربنا في عيونه تملي حنان
بيشيلك في ذراع الدنيا أمان
ويعلمك الكون بالراحة
تتمرد
تتنازل عن دورك فوراً
وتقرر تبقي ملاك
وف آخر مشهد
بتسلم روحها لواحد غيرك
وتبان في عيون البنت شيطان
